(60) ning hpring Wunpawng Mungdan Shanglawt Hpung masat ninghtoi hpawng galaw
(60) ning hpring Wunpawng Mungdan Shanglawt Hpung (KIO) masat ninghtoi hpawng hpe October shata (25) ya jahpawt hkying 8:00am aten hta Padang Hkrun Lam Majan Masing Woi Awn Rung Gawk Nu kaw galaw la lu sai re.
Hpawng hta Ginjaw Komiti Tingnyang Up Malai Du Daju Jum Gunhtang Gam Shawng hte rau Ginjaw Komiti Salang ni, Ningawn Daju Pati Komiti Dinggrin Salang ni, Amyu Shayi Hpung Ginjaw magam gun ni, SMJH magam gun salang ni sa du shang lawm ai re.
Hpawng hta KIO Ninggawn Amu Madu Salang Kaba Kumhtat Hting Nan kaw nna KIO Ginjaw Komiti Tingnyang Up Du Daju Jum Nban La a (60) ning hpring Wunpawng Mungdan Shanglawt Hpung masat nhtoi mungga hti shalai ai hta,
“KIO gaw Wunpawng Mungdan masha ni a myit hkrum gahkyin gumdin ai, mungshawa yawng hpe lam woi awn ai, mungshawa gawng malai tai ai hte (60) ning laman ram ging ai madang du hkra lit la gunhpai sai. Mung masha ni, KIO magam gun ni yawng shanglawt ai Mungdan ra marit ai myit masin hte kaning re ai yakhkak jam jau ten raitim, myit marai n shayawm ai sha apnawng shakut gunhpai ai majaw, KIO gaw Mungkan mungmasa pinra ntsa e sari sadang nga nga hte hkawm sa lu ai lam mungga hta lawm ai re” nga nna tsun dan ai.
Ginjaw Komiti Tingnyang Up Malai Du Up Jum Gunhtang Gam Shawng kaw nna Wunpawng Mungdan Shanglawt Hpung, Ginjaw Komiti Tingnyang Up Du Daju Jum Nban La a (60) ning hpring Wunpawng Mungdan Shanglawt Hpung masat ninghtoi numhtet shatsam mungga hpe mahta nna tsun sang lang dan ai hta, “Wunpawng amyu sha ni dip da hkrum ai kaw nna awmdawm ai hpun da de du lu na matu KIO gaw, mungshawa yawng a gawng malai tai ai ni re” nga nna tsun dan ai.
KIO masat nhtoi hpe lai wa sai shaning ni hta gaw, dap shawa, mungshawa masha ni yawng hkra hpawng chyawm nna Ginjaw Komiti Tiangnyang Up a KIO masat nhtoi mungga hpe madat hkam la ai lam galaw ai raitim, ya aten COVID-19 ana zinli byin nga ai aten ladaw re majaw, hpawng lamang hpe Ginjaw COVID-19 Ana Zinli Makawp Ninghkap Komiti a lam masan ai tara hte maren galaw ai re lam chye lu ai.
