Hpakant kaw COVID-19 ana kap ai masha marai 24 bai jat
Hpakant kaw October shata 20 ya shani COVID-19 ana zinli kap ai masha nnan marai 24 bai jat sai lam, ginra masha ni shana wa ai kaw na chye lu ai.
COVID-19 positive mu ai masha ni gaw Tawng Pyu mare kaw na marai 22 re lam, ana kap hkrum ai machyi masha ni gaw Hpakant Ti Da Gu Tsi Rung kaw tsi tsi hkam la nga ai rai nna, Quarantine bang nhtawm ana jep chyoi da ai masha marai 100 jan naw nga ai lam chye lu ai.
COVID-19 ana zinli kap ai masha lani hte lani grau law jat wa ai majaw, Hpakant ginra hta hkamja lam jep chyoi dabang shara 5 masat nna pru shang masha ni hpe Quarantine dabang nna ana jep chyoi ya nga ai lam, Jinghpaw Mung Hkamja lam Hkringmang Rung kaw nna mung October shata 20 ya shani kaw nna Hpakant ginra hpe Stay At Home masat da sai rai nna, pru shang masha ni hpe tara hte hkrak jen jep sa wa na matu hkyen lajang nga ai lam, Wunpawng Amyusha Zinlum Hpung Amu Madu Salang Dashi Naw Lawn tsun dan ai.
“Dai ni kaw na gaw kadai mung shinggan de nle na hku lawk langai hte langai mung hkawm sa hkawm wa card hte hkawm sa ra na, Hpakant kaw na Seng Tawng de nmai sa na hku ndau hkyen nga ai, mare kata kaw hkawm sa hkawm wa hpe tara hte hkrak galaw sa wa na hkyen nga ai” nga nna tsun dan ai.
Ya aten Jinghpaw Mung kata COVID-19 ana kap ai masha marai 119 nga sai rai nna, Hpakant ginra gaw COVID-19 ana kap bra ai sawng dik htum ginra re lam chye lu ai.
