Hpakant Mashi Kahtawng kaw game seng nta langai wan hkru
Hpakant, Mashi Kahtawng kaw October shata 19 ya shani hkying 10:30am aten daram hta wan sumri hkru wa ai majaw Miwa Game seng nta langai hkru lawm mat ai lam buga masha ni shana wa ai kaw nna chye lu ai.
“Wan hkru ai nta gaw madu nnga ai, nta sin ai ni sha nga ai re. Nta gaw hpun pyen nta re hte nam myin mung grai law hkra chya da ai re hte wan sumri hkru wa ai majaw nta nawng yawng hkru lawm mat ai re” nga nna ginra masha Maran Ra Ra tsun ai.
Wan hkru ai hta game jak arung arai ni, kaga arung arai ni hte nta nawng yawng hkru lawm mat ai raitim, masha hkala nba nhkrum ai lam chye lu ai.
Ndai nta gaw shawng de Game seng hpaw ai miwa nta langai re. Seng pat da ai mung grai na sai re. Nta madu nnga ai sha nta sin ai ni hkrai nga ai aten hta nta wan hkru ai lam byin ai re.
Seng ang ai salang ni, hpyen la ni, wan sat maw daw 4 hte hkying 11:10am aten daram hta wan bai shazim kau lu ai re.
Ginra masha ni tsun dan ai hta, ndai nta gaw grai hkru mat ai raitim hpun maling grai law hkra nga ai hte marang ma htu ai re majaw makau gyup yin na nta htingbu ni hta wan kap bra hkru ai lam nbyin ai re, grau nna gaw lam kaja sai re majaw wan sat mawdaw ni mung alawan sha lu du ai hte aten kadun laman kaw sha shazim kau lu ai re lam, tsun dan ai.
Hpakant Mashi kahtawng hta wan hkru ai lam nbyin ai aten ladaw mung na sai rai nhtawm nta wan hkru ai lam gaw shawng ningnan wan hkru ai re lam buga masha ni kaw nna chye lu ai.
Mashi Kahtawng mare ting hta rai yang nta htinggaw yawng 600 daram nga ai rai nna, nta ni mung grai ni kahtep ai re majaw wan hkru ai lam byin wa ai rai yang mare masha ni a matu grai myit tsang hpa re hpe mung ginra masha ni tsun dan ai.
