Manmaw Ginwang na hpyen yen mungshawa ni, September shata kaw nna tinang mare buga de lu wa sai
Photo Credit; Zaw Hkam
KBC kaw nna woi awn ai hte Nmawk, Manje myo nay kata na hpyen yen mungshawa ni hpe tinang mare buga de bai wa lu na matu, du wa na September shata kawn ta tut hkrang shapraw sa wa na re lam chye lu ai.
Hpyen yen mungshawa ni tinang buga de bai wa na hte seng nna, seng ang ai Asuya salang ni hte Manmaw ginwang ting na hpyen yen dabang lit hkam ni, Hpung Up, Hpung Sara ni, KBC Ningbaw/ Amu Madu hte Bawng Ring magam dap Hpa-awn ni yawng August shata praw 7 ya shani hta hkrum zup bawng ban myit hkrum da lu sai re.
Shawng nnan wa magang na buga mare ni gaw Gwi Kahtawng (Deng 17, Bum San Yang Buga), Jahkan Dap (Deng 15, Bum San Yang Buga), Wa Wang (Lung Ja Buga), Hka Wan Bang mare (Law Dan Buga), Ga Ra Yang mare ( Manje Buga), Num Lang mare (Num Lang Buga), Daw Hpum yang (Daw Hpum Yang Buga) kaw na ni rai nhtawm hpyen yen mungshawa htinggaw 200 daram re.
Shawng wa na hkyen ai ndai shara ni gaw, mungshawa yawng hprawng koi yen mat ai nre sha malawng gaw mare hta naw nga taw nga ai shara ni re.
Photo Credit;
Raitim Myen mung hpyen dap kaw nna mung August shata htum du hkra sha, gap hkat jahkring da ai re majaw mungmasa lam gara hku mai byin wa na nchye lu ai hte hpyen yen mungshawa ni a shim lum lam hte seng nna mung tup hkrak nchye lu ai lam KBC Ningbaw tsun ai.
Ndai lam hte seng nna KBC a Ningbaw Dr.Hkalam Sam Son kaw nna ya na zawn tsun dan ai.
“Shim lum ai ngu hpe anhte lachyum bai hpyan yu ai shaloi gaw, shim lum ai ngu gaw kadai mung pahkam lu jaw na nshadu ai. Raitim mung kam let wa ga ngu na tsun ai re. Shim lum ai ngu gaw myu kata kaw pi nshim lum ai re majaw gara hku tsun na grai yak nga ai. Mi gaw anhte gaw shanglawt hte myen lak mat htu jang gaw pahkam nga ai ngu hku tsun ai le. Raitim mung dai lak mat htu na she wa ga ngu yang mung hpyen yen ni gaw nlu la sai gaw.”
KHCC kaw nna mung hpyen yen mungshawa ni, tinang mare buga de bai wa lu na hte seng nna myen Asuya hte shang lawt Asuya ni hte hkrum zup bawng ban ai lam nga lai wa sai re hpe mung chye lu ai.
