Muk gangau sha shut nna masha marai 4 asak si sum mat

Nhkawng Pa Buga Kum Gau mare hpung lawk hta January praw 3 ya shani Muk gangau sha shut ai marai 10 hta na marai 4 gaw Mai Ja Yang Mungshawa Tsi Rung sa wa ai lam lapran kaw nnga mat ai lam chye lu ai.

Ngam ai marai 6 hpe gaw ya yang Miwa Mung Janghong tsi rung kaw tsi gawn lajang nga ai, marai langai gaw dum dat, ndum dat rai taw ai marai lahkawng gaw sai gashin ra ai madang rai nna, ngam ni gaw hkyamsa wa sai nga nna Mai Ja Yang Tsi Rung Up tsun ai.

Machyi masha ni hta byin ai kumla ni gaw, gying htan ai, bawnu ni ndang hkang ai madang re. Lusha hpe anhte wa jep ai shaloi mahtai nlu jep shapraw ai majaw, Janghong de bai wa jep ai dai kaw mung tengman ai mahtai hpe nlu jep shapraw shi ai lam, Tsi Rung Up matut tsun ai.

Muk galaw ai kaw bang ai hpan ni gaw, Nbaw shadung, Nam Htan, Soda, ni hte gayau nna gangau sha ai, ndai hpe shaning ningnan shani mung alu tam ai hku nna shinggan de mung gangau dut ai, shadung grai naw ngam ai majaw, mani hpawt bai gangau sha ai shaloi ya na zawn byin ai re lam chye lu ai.

Asak si sum mat ai ni gaw Salang Maru La Tawng Asak 65 ning, Jan Gawlu Kaw Ling Asak 63 ning, Shadang Maru Naw Din Asak 5 ning, Shadang Maru Myu Htoi Awng Asak 2 ning ni re, makoi mayang akyu hpyi hpawng hpe daini January praw 4 ya shani galaw kau sai lam chye lu ai.