Myen Mung Jawngma Hpyen Dap ABSDF hpaw hpang ai ( 30 ) ning hpring masat ninghtoi hpawng galaw
Myen Mung Jawngma hpyen dap ABSDF hpaw hpang ai ( 30 ) ning hpring masat ninghtoi hpawng lamang hpe November shata 1 ya shani hkying 1:00pm aten kawn hkying 3:00pm aten laman, Laiza Muklum manau wang Sinpraw Majoi Gawknu hta galaw ai lam chye lu ai.
Hpawng hpe numdaw lahkawng hku galaw ai rai nna, jahpawt daw hkying 8:00am aten hta 5 ning a lahta 30 ning du hkra na magam gun masha ni hpe shagrau dazik hte masat laika pa ni shagrau ai lamang galaw ai.
Shawng nnan Dingdung daw Jawngma Dap Lithkam Sara La Seng kaw nna hpawng hpaw mungga tsun ai hta, Dai ni ndai lamang galaw ai lam gaw, mungdan kata na mungmasa wuhpung ni hte Jawngma Dap magam gun ni jawm pawng kahkyin nhtawm, matut nna Myen Mungdan a hpyen gumshem lai masa hkrat sum mat u ga hte, shawng lam hta gara hku rawt jat galu kaba wa hkra, gara hku bungli hkrang shapraw sa wa na ngu ai lam ni hpe yaw shada let galaw ai re lam tsun ai.
Wunpawng Mungdan Shanglawt Hpung, Ningbaw Malai ( I ) Du Up Sumlut Gun Maw kaw nna mung, Jawngma Dap nnan hpaw hpang ai kaw nna dai ni du hkra, KIO Ginjaw Komiti mung Jawngma Dap hpe jinghku dap hpawm langai hku maren mara masat masa galaw ai hte ta gindun nga ai lam, dai ni 30 ning hpring masat ngut ai hpang, htawm hpang de masat hpawng n-galaw ra ai sha, maren mara nga pra sa wa lu ai federal munghpawm mungdan byin tai wa lu u ga ngu tsun n-gun jaw mungga shaga ai.
Matut nna Jawng ma ningbaw dingsa ni rai nga ai ကုိတင္ၾကဴ, ကိုသန္႔ဇင္ hte ကုိေသာ္လြင္ ni hku nna mung, shagrau mungga shaga ai. Dai hpang Myen Mung Jawng ma dap ningbaw ရဲေဘာ္သံခဲ kaw nna mung, mungga tsun ai hta ABSDF Jawng ma hpyen dap gaw mungshawa kaw nna shangai shapraw dat ai Jawngma hpyen dap re. Hpyen gumshem lailen hpe laknak lang rawt malan ai hte mungmasa hku nna mung ladat amyu myu hte adawt gasat ai sha n-ga daini na mungmasa hta hkan nna n nga nmai Jawngma dap langai re lam tsun mungga jaw ai.
Dai ni na Jawngma dap a 30 ning hpring masat ninghtoi hpe shagrau ai hku nna wuhpung 19 kaw na shagun laika ni hpe shagun jaw ai. Shana na aten hta mung yu ngwi pyin ra lamang galaw ai re lam chye lu ai.
