Share shagan masat ninghtoi akyu hpyi hpawng galaw
Laiza Muklum Padang Rung Zuphpawng Gawknu kaw August shata 10 ya jahpawt hkying 8:00am aten hta KIO share shagan masat ninghtoi akyu hpyi hpawng hpe galaw ai lam chye lu ai.
Hpawng hta nawku hpung woi sara ni kaw nna akyu hpyi ya ai, KIO Tingngyang Up Du Daju Jum Nban La a share shagan masat ninghtoi shatsam mungga hpe Ginjaw Komiti Tingngyang Up Malai Du Daju Jum Gunhtang Gam Shawng kaw nna hti shalai ya ai hta,
“Dai ni na ten nlaw la ai Wunpawng amyu sha ni myit hkrum Makai hkak let amyu hte Mungdan lawt lu lam hpe ahkyak tawn galaw sa wa ra nga ai ten hta social media hpe sunglang nhtawm, shada da mara tam tsun jahpoi jahpyak shada zingrut htu nna, anhte shada kata hpyen ga, ga hkat wa nga ai hpe mu lu ai majaw na chying hkrit tsang ra ai masa de gale wa sai ngu tsun shadum mayu ai.
Social Media hta hpa mung mai tsun sai gaw ngu nna, KIO hpe hten run mat wa hkra anhte amyu sha ni nan tai hpyen wa galaw na bungli hpe hkan galaw garum ya ai ni law nga ai hpe mu lu ai majaw myit npyaw nngai, magam gun masha ni ra rawng shut shai ai hpe madi madun lam shading ya na matu, mungshawa ni hta lit nga ai raitim, nteng nman ai lawnglam ni hpe tak maram sawn shachyaw la nna, kahtap gala tsun jahpyak ai a majaw mung shawa ni hta myit ung ang ai lam, myit kaji myit daw ai lam byin shangun ai hpe ja ja koi gam kau ra na re”
Share shagan masat ninghtoi hpe lai wa sai shaning ni hta gaw dap shawa mungshawa law law hte wu wu di di galaw ai raitim, dai ning gaw COVID ladaw re majaw Ginjaw COVID-19 Ana Zinli Makawp Ninghkap Komiti a lam masan ai kata kaw, share shagan masat ninghtoi hpawng hpe Ginjaw Komiti Salang ni, makam masham hpung woi sara ni, Ginjaw Amyu Shayi Hpung ni hte magam dap, makan dap shagu na magam gun ni sa du shang lawm ai hte galaw la lu sai re.
Wunpawng Mungdan Shanglawt Hpung Ginjaw Komiti Tingngyang Up Kongsi Ningbaw Kaba GOC Lahtaw Zau Seng gaw lai wa sai 1975 ning August shata 10 ya shani hta Thai Mungdan Htang Ngawp Kahtawng kaw Tai Hpyen Gumlau ni a lata hta asak ap nawng mat wa sai re. Dai ninghtoi hpe mahta nna, Amyu hte Mungdan a matu asak ap nawng lai mat wa sai myu tsaw share shagan ni hpe myit dum hkungga shagrau ai masat ninghtoi lamang rai nga ai.
Ndai masat ninghtoi hpawng hpe KIO uphkang ginra hte Maigan Mungdan kaw du nga ai Wunpawng amyu sha ni mung myit dum akyu hpyi ai lamang galaw nga ai lam chye lu ai.
