Share shagan masat ninghtoi hpe masat shagrau ai hku nna ga shagawp, sumroi, sumrai shingjawng lamang galaw
Mai Ja Yang IEd jawng hta share shagan masat ninghtoi hpe masat shagrau ai hku nna ga shagawp, sumroi, sumrai shingjawng lamang hpe August shata 10 ya shani galaw ai lam chye lu ai.
Lamang hta jawngma ni hpe tsang hte tsang shaga la nhtawm ningbaw kaba a mungga hti jahpra dan ai lam, share shagan masat ninghtoi a lachyum hpe sang lang dan ai lam galaw ai sha n-ga, share shagan masat ninghtoi hpe shagrau ai hku nna ga shagawp, sumroi, sumrai, hkrang pan hte Cartoon shingjawng lamang ni woi galaw ai rai nna, shingjawng lamang hta masat lu ai jawngma ni hpe kumhpa masat shagrau na matu hkyen lajang da ai lam, IEd jawng magam gun, Laili Laika Team Ningbaw Sara Tangbau Hkawng Lum tsun ai.
“Ndai hpan 5 hpe shingjawng mat wa ai hta ningtawn ai ni hpe nambat 1,2,3 hku nna jaw ai, shanglawm shingjawng kumhpa hpe mung hkyen lajang da ai, nambat 1,2,3 lu ai hkrak ai ni hpe mung dai ning shapraw na journal laika buk kaw shanhte ka da ai hkrang pan, ga shagawp, sumroi sumrai ni hpe bang nna masha law law hpe htawng madi madun ai hku nna bang wa na matu yaw shada da ai re” nga nna tsun ai.
Ya na zawn lamang woi galaw ai yaw shada lam gaw KIO uphkang ginra kata na jawngma ni hte kaga ginra kaw na jawng sa lung ai jawngma ni yawng shanglawt hpe woi hpang ai ningbaw ningla ni a hkrat sum ai ninghtoi hpe galoi mung myit dum taw na matu hte grau nna chye wa lu na matu yaw shada ai re lam, Sara Tangbau Hkawng Lum matut tsun ai kaw na chye lu ai.
Ya aten IEd jawng hta jawngma yawng marai 477 hpaji sharin hkamla nga ai rai nna, jawng hpe August shata praw 3 ya shani kaw nna hpaw sharin hpang sai lam chye lu ai.
Photo Credit; Mung S Maran
