10th lang na Kutkai Ginwang a Rap Shapan Chyum sharin hpawng galaw
Jinghpaw Wunpawng Hka Lup Hpung Ginjaw, Kutkai Ginwang a 10th lang na KGZ Rap Shapan chyum sharin hpawng hpe Ga Leng buga Hkalup hpung nawku jawng kaw August shata 30 ya shani kaw nna 31 ya shani du hkra galaw ai lam chye lu ai.
Sharin hpawng hpe Ga Leng Buga hte Na Hkyeng buga ni lit la woi galaw ai rai nhtawm, Kutkai Ginwang kaw na Sara/ Saranum ni marai 10 sa du sharin ya ai rai nna, Lak Jet sharin sara ni gaw Rev.Lahpai Zau Htoo ( KGZ Hkristan hpaji dap hpa-awn ), Rev. Maran Zau Man ( KGZ amu madu ), Saranum Nang Mya Han ( KGZ num hpa-awn ), Sara Lahkum Lahpai Hkun Seng Hkam ( KGZ sut hpa-awn ) ni re. Madung sharin ai gabaw gaw “Hkristu a Dat Kasa” ngu ai gabaw a kata kaw Hkristu a dat kasa re lam, Hkristan dinghku sak hkrung lam, Kahpret hkra ai ginru ginsa lwi masa, Makam rawng ai sut shang lam ni hpe sharin ya ai re nga nna Ga Leng Buga Amu Madu Dumhpau Htu San tsun ai.
KGZ Rap shapan Chyum sharin hpawng hpe shaning shagu galaw ai rai nhtawm, Kutkai buga, Namhpakka buga, Hka Wan buga, KTC, Mung Ne, Kutkai sinpraw, Kawnghka, Man Je, Mung Ji, Bum Wan hta galaw lai wa sai rai nna dai ning gaw Ga Leng Rap hta galaw ai lam chye lu ai.
Sharin hpawng hta Ga Leng rap kaw hpyen koi yen nga ai mungshawa ni, Ga Leng buga hte Na Hkyeng buga hta shanu nga ai mare kahtawng shagu na kam sham ai Hpung masha ni yawng marai 300 daram sa du shang lawm ai lam chye lu ai.
