(11) Lang na Manmaw Ginwang Jinghpaw Wunpawng Hkalup Hpung Ramma sharin hpawng galaw
(11) Lang na Manmaw Ginwang Jinghpaw Wunpawng Ramma shawa sharin hpawng hpe October shata praw 5 ya shani manam zup rai nna, Manje Buga Hkalup Hpung sasana wang kaw galaw hpang nga sai lam chye lu ai.
Sharin hpawng hpe praw 6 kaw na praw 8 ya shani du hkra galaw sa wa na rai nna, praw 9 ya shani manam bra na re lam ginra masha langai tsun ai.
Dai ning na sharin hpawng a ga ba gaw, Tengman Dinghpring Ai Lam hta Gwi Gwi Tsap Ai Ramma ngu ai ga baw n pu e sharin sa wa ai sha n-ga, Hkristu hta Myihkrum Kahkyin Gumdin Ai hte Amyu Mungdan hpe Gawgap Ai Ramma hte JHZ Labau hte KBC Makan Hkridum ngu ai ga baw ni hpe sharin sa wa na lam chye lu ai.
Manmaw Ginwang KBC ramma Chyum laika sharin hpawng hta du sa ai ramma yawng marai (800) jan sa du sharin hkam la nga ai rai nna, Ramma Chyum laika sharin hpawng gaw 4 ning hta kalang galaw ai hta n dai kalang gaw Manje buga hta galaw ang ai lam chye lu ai.
