(11) Lang na Manmaw Ginwang Ramma shawa sharin hpawng galaw sa wa na
Manmaw Ginwang, Hkristan Hpaji Dap ramma komiti kaw na woi awn galaw ai, (11) lang na Manmaw Ginwang ramma shawa sharin hpawng hpe du wa na October shata hta Manje Buga Hkalup Hpung nawku jawng wang kaw galaw sa wa na lam chye lu ai.
October shata praw 5 ya shani hta manam zup rai nna, praw 6 ya shani kaw nna praw 8 ya shani du hkra sharin sa wa na re nhtawm praw 9 ya shani manam bra na lam buga masha langai tsun wa ai.
Sharin hpawng hta 1. Makam Masham Ngang Kang Ai Ramma, 2. Myit Masin, Hkum Hkrang hkam kaja ai Ramma, 3. Tengman Dinghpring Ai Lam Hta Gwi Gwi Tsap Lu ai Ramma ni tai sa wa lu na matu, ngu ai sharin ginhpan ni hpe sharin sa wa na re lam chye lu ai.
Ramma ni hku nna sharin hpawng hta mying bang manu Myen gumhpraw 5000 kyat, lu sha manu 30000 kyat bang ra na rai nna, yup ra hpun nba matsing laika buk ni lawm sa ra na lam chye lu ai.
Manmaw Ginwang hta Buga Hpung (45) nga ai rai nna, Buga Hpung shagu na ramma ni yawng sa du shang lawm sharin hkam la ga nga nna, ndau laika hta tsun da ai.
