123 gumshem Myen hpyen dap hpe KIA ni gasat zing madu la lu
Mungmyit Sinli Ga (Kachin Sub-state) ginra, Namhpaka kaw dap jung nga ai, 123 gumshem Myen hpyen dap hpe KIA ni htim gasat zing madu la lu sai lam chye lu ai.
Namhpaka kaw dap jung shara jahkrat nga ai, Hk.L.Y (123) dap dingsa, (45) kawng hpe KIA pawng hpawm hpyen hpung ni January shata praw 3 ya jahpawt hkying 8:00am aten kaw na kalang bai htim gasat ai hta shana daw hkying 6:30pm aten daram hta padang dip gasat zing madu la lu sai lam, shawng lam na lit nga ai salang langai tsun ai.
Ndai gumshem Myen hpyen dap hpe KIA pawng hpawng hpyen hpung ni lai wa sai 2023 ning December shata 29 ya shani kaw na htim gasat nga ai hta 2024 ning January shata praw 3 ya shani padang dip gasat zing la lu sai re.
Ya na zawn numdaw hte numdaw gasat gala majan ni byin nga ai ten hta gumshem Myen hpyen dap ni kaw na, nbungli hte bawm wa jahkrat gap garum ai lam ni mung nga lai wa sai lam chye lu ai.
Mungmyit Sinli ginra ni hta gumshem Myen hpyen dap hte rawt malan wuhpung wuhpawng ni gasat gala majan laja lana byin nga ai sha n-ga, KIA hte mung gasat gala majan byin nga ai re.
