123 gumshem Myen hpyen dap hte KIA ni gasat gala majan matut byin nga
Mungmyit Sinli Ga (Kachin Sub-state) ginra, Namhpaka kaw dap jung nga ai, Hk.L.Y (123) gumshem Myen hpyen dap ni hte KIA pawng hpawm hpyen hpung ni gasat gala majan matut manoi byin nga ai re lam chye lu ai.
December shata 29 ya shani 123 gumshem Myen hpyen dap hpe KIA pawng hpawm hpyen hpung ni htim gasat nga ai hta December shata 30 ya jahpawt hkying 7:50am aten daram kaw na kalang bai gasat gala majan matut byin nga ai lam, shawng lam na lit nga ai salang langai tsun ai.
Gasat gala majan byin nga ai ten gumshem Myen hpyen dap ni Jet Fighter 2 hte bawm wa jahkrat bun ai rai nna, Y-12 nbungli hte 70 lang daram bawm wa jahkrat bun nhtawm, hpyen masa mung shaja hkat nga ding yang re lam, salang wa matut tsun ai.
Matut nna December shata 30 ya jahpawt hkying 7:45am aten kawn hkying 8:30am aten laman, Myitkyina hte Manmaw lam rai nga ai Mali Yang kaw dap jung shara jahkrat nga ai, gumshem Myen hpyen dap ni hte KIA ni laja lana gasat gala majan byin ai lam nga ai.
Mali Yang kaw dap jung nga ai gumshem Myen hpyen dap ni, Kagam Bum de malu masha wa gun la ngu lung wa ai hta KIA Masat (1) Dap Nawng Daju, Masat (253) Dap Nawng Dap Dung ni shara la hkap nga ai kaw pru wa ai majaw, laja lana gasat gala majan byin ai hta gumshem Myen hpyen dap maga si sum hkala ai lam law ai re hpe chye lu ai.
