125 ning hpring Jinghpaw laika lu la chyeju shakawn hpawng galaw na
Photo Credit; LGZ
125 ning hpring Chyurum Jinghpaw Wunpawng Jinghpaw Laika lu la ai chyeju shakawn hpawng hpe du wa na December shata 29 hte 30 ya shani Lawu ga Ginwang rung wang (Awng Panglai Ka-ang Majoi-Mandalay) hta galaw na lam chye lu ai.
“Ndai laika gaw Karai Kasang jaw ai sumsing laika re ndai hpe anhte manu shadan ra ai. Maigan mungdan ni de du hkawm mat ai raitim, Jinghpaw laika hpe manu shadan let grau nna madang tsaw wa hkra akyu jasawn jai lang sa wa ga” nga nna Lawu Ga Ginwang Ramma Hpa-awn Sara Lahpai Chyau Fa Hkun tsun ai.
KBC Ningbaw, Amu Madu hte kaga ni ai tsan ai buga nawku hpung mungshawa ni yawng hpe saw shaga let galaw sa wa na hku myit shajin da ai lam nga ai raitim, COVID-19 ana zinli a majaw wu wu di di rai nlu galaw mat ai lam re. Nawku hpung ni de laika shadu shana da ai ram sha rai sai nga nna sara matut tsun ai.
125 ning hpring Jinghpaw laika lu la ai chyeju shakawn hpawng hpe lai wa sai February shata hta mung, Manmaw kaw galaw ai KBC kasa hpawng hta kadun ai hku galaw sai raitim, Mandale buga hpung ni gaw, buga madu re majaw, KBC de bai tsun nna galaw sa wa na re lam chye lu ai.
Lai wa sai aten ni hta KBC kawn lit la woi awn galaw ai raitim, dai ning gaw ana zinli a majaw KBC kaw nna ahkang jaw ai hte maren lawu ga Ginwang ni sha lit la nhtawm, Mandalay grup yin hta nga ai nawku hpung shawa ni hpe sha, saw shaga let, hkamja dap kaw nna matsun ai hte maren galaw sa wa na re lam chye lu ai.
Jinghpaw laika hpe lai wa sai 1895 ning hta lu la ai rai nna, 1995 ning hta 100 ning hpring Jaw Poi hpe Mandalay buga kaw galaw la lu sai re. Dai ning 2020 ning hta gaw Jinghpaw laika lu la ai 125 ning hpring ai chyeju shakawn hpawng rai nga ai.
