13th lang na KBC num shawa sharin hpawng kaba galaw na hkyen
13th lang na KBC num shawa sharin hpawng kaba hpe KBC num magam dap kawn woi awn let April shata praw 3 ya shani kaw nna 8 ya shani du hkra Myitkyina Ginwang, Hkalup sasana chyum jawng wang, Ra Da Kawng ( A ) hta galaw sa wa na re lam chye lu ai.
“ Makam Nli Kaja Hte Amyu Hte Mungdan Hpe Woi Awn Gaw Gap Lu Ai Kanu” ngu ai Ga baw kaba a npu hta sha KBC a Ningbaw Rev.Dr Hka Lam Samson hte Singapore kaw na Rev. Zinghang Gam Htun yan kawn sharin ya na re lam chye lu ai.
Ndai sharin hpawng a yaw shada lam hte masing ni hpe KBC Muna Kyit Hkai Magam Dap Hpuawn Sara Maran Naw Di Awng kaw nna ya na zawn tsun dan ai “ Dai ning a Gabaw rai nga ai Makam Nli Kaja Hte Amyu Hte Mungdan Hpe Woi Awn Gaw Gap Lu Ai Kanu ngu ai gabaw hte maren num ni hku nna mung amyu hte mungdan hpe gaw gap lu ai, gaw gap woi ai maga de tsap wa lu hkra ngu yaw shada ga ai. Amyu shayi ginlung hpawng, hkawn ji sharin hpawng hku nna mung matut nna galaw sa mat wa na masing ni nga ga ai ” nga nna tsun dan ai.
Ndai KBC num shawa sharin hpawng kaba hta Ginwang 12 a ginsup shing jawng ai lam, mahkawn ka shing jawng ai lam, ga tsun shing jawng ai lam hte yu ngwi mahkawn ai lam ni hpe myitkyina Ginwang ni kawn woi awn nna galaw sa wa na re lam chye lu ai.
