( 16 ) lang na Janshi Ginwang ramma sharin hpawng galaw
Miwa Gumsan Mungdan, Sakhkung Mungdaw Janshi Ginwang Ramma Komiti ni woi awn nna, ( 16 ) lang na Janshi ginwang ramma sharin hpawng kaba hpe Hola buga, Huiyi mare nawku jawng kaw, August praw 7 ya shani kaw na August 12 ya shani du hkra, “Lam shagu hta rawt jat kaba wa u ga” ngu ai ga baw hte sharin hpawng galw nga ai lam, hpawng hta lawm ai ramma langai shana wa ai.
Sharin hpawng a yaw shada lam gaw, Chyum Laika hpe madung chye wa lu na matu re. Sharin sara ni gaw, ( 1 ) Sara Mading Yaw Kyang ( 2 ) Sara Lagui Ying ( 3 ) Sara Lagui Bawm Ting ni rai ma ai.
Ndai sharin hpawng hta, buga ( 19 ) na ramma marai ( 300 ) jan sa du sharin hkamla nga ai, Janshi ginwang hta Hkalup hpung masha yawng marai 20,000 jan nga ai rai nna, Sakhkung Mungdaw kaw Hpung masha law dik ai ginwang re. Laning mi hta kalang mi galaw ai sharin hpawng re lam, dai ramma wa tsun ai kawn chye lu ai.
