16th lang na jawng awng masat shagrau nawku hpawng galaw
Waimaw KBC Chyum Jawng a 16th lang na jawng awng masat shagrau hpawng hpe Waimaw Chyum Jawng wang, Sinpraw Majoi Lung Byid Gawknu kaw March shata 2 ya shani hkying 11:00am aten hta galaw ai lam chye lu ai.
Jawng awng pru ai jawngma ni gaw C.Th na marai 10, L.Th na marai 11 yawng marai 21 tup re lam, Waimaw Chyum Jawng Up Rev. Htawshe Dau Hkawng tsun ai.
Jawng Ningtawn kumhpa lu ai ni gaw C.Th Program kaw na No.1 Sumwai La Ja ( Shawegu Buga, Manmaw Ginwang ), No.2 Lawwai Hkawng Lum (Nawnghkying Buga, Waimaw Ginwang ), No.3 Lahpai Nang Chying (Hpawng Seng Buga, Mungmau Ginwang ) hte L.Th program kaw na No.1 Hpauna Hkawn Mai ( Nazaret Buga,Waimaw Ginwang ), No.2 Shapre La Nu ( Seng Hpra Buga, Uru Seng Maw Ginwang ), No.3 Xanhka Dau Nyoi ( Htawlaw Buga, Chihpwi Ginwang ) ni re.
Waimaw Chyum Jawng hta C.Th, L.Th, B.Th, B.Min hpan 4 hpe sharin ya ai lam re. Jawng lung shaning gaw C.Th 3 ning, L.Th hte B.Th 4 ning hte B.Min hpe gaw dai ning kawn hpaw hpang ai re. Jawng yu ngut ai jawng ma ni gaw KBC kawn galaw ai magam shachyen bat 3 lung la ngut ai hte tinang seng ang ai mare buga de magam gun sai re, nga nna Jawng Up tsun ai.
Waimaw Chyum Jawng hpe 2001 ning kaw na hpaw hpang ai rai nna jawng awng pru ai jawngma ni yawng 300 jan awng pru sai re lam chye lu ai.
Dai ni na jawng yu poi hta sadu shang lawm ai mungshawa ni yawng marai 500 jan sadu shagrau lawm sai re lam chye lu ai.
