16th lang na Mungdan Hkamja Dap hkumra Zuphpawng galaw
16th lang na Mungdan Hkamja Dap hkumra zuphpawng hpe Laiza Muklum, Wunpawng Mungdan Shanglawt Asuya, Mundan Hkamja Dap Ginjaw Rung kaw February shata 24 ya shani kaw nna 26 ya shani du hkra galaw na re lam chye lu ai.
2019 ning a shaning ginchyum dat zuphpawng hte 5 ning masing hte seng nna galaw la lu sai lam ni hpe bawngban ai zuphpawng re.
“Madung bawngban ai gaw Mungshawa Hkamja san seng lam, 5 ning ladaw hta bai hpang na bungli masing hte seng ai lam, Mungkan hta hkrit tsang ra ai kap bra ana rai nga ai Wuhan Virus ana hte seng ai lam, Amyusha Hkamja bawng ring rawt jat lam hpe matut nna gara hku woi galaw na, laning mi laman gara hku galaw sai, matut nna gara hku galaw na ngu ai mungshawa hkamja gawn hkang bungli hte seng ai lam hpe madung dat nna galaw ai re” nga nna Ginjaw Hkamja Dap Ningtau Amu Madu Du Kaba Kadang Manau Tu Awng tsun ai.
Hkrumra Zuphpawng hta Mungdan Hkamja Dap Ginjaw kaw na Salang ni hte Ginwang Ginjaw shagu na Hkamja Du ni marai 30 sa du shang lawm ai lam chye lu ai.
Hkrumra zuphpawng hpe shaning shagu galaw ra ai raitim, hpyen majan masa amyu myu a majaw, 2 ning 3 ning hta kalang sha lu galaw ai re lam chye lu ai.
