1st lang ngu na ( 1974 -2010 ) ning lapran na chyeju madu sara/ saranum ni hpe shagrau sha-a ai lamang hte chyeju shakawn wunli la hpawng galaw
1st lang ngu na ( 1974 -2010 ) ning lapran na chyeju madu sara/ saranum ni hpe shagrau sha-a ai lamang hte chyeju shakawn wunli la hpawng hpe Laiza Muklum, Laiza lahta tsang jawng Rawt Ninghkawng Gawk Nu kaw December shata 20 ya shani hkying 10:00am aten hta galaw ai lam chye lu ai.
Hpawng hta shawng nnan myusha dawng hkawn hpe hkung ga jaw ngut ai hpang, Rev.Hkalam Gum Hpan Lat kaw nna hpawng hpaw akyu hpyi ya ai. Daini na hpawng hta Sara/saranum ni hpe kumhpa shagrau sha-a ai lam, lagaw kashin ya ai lam galaw ai re.
Lamang a yaw shada lam gaw jawng hpaw hpang wa ai 1974 ning kaw nna 2010 ning du hkra laika hpaji sharin ya lai wa sai magam gun sara/saranum ni hpe shagrau sha-a mayu ai hku nna galaw ai re hte ndai zawn lamang hpe galaw ai lam nnga shi ai, anhte jawngma ni mung kalang mung n galaw ga shi ai re majaw alak mi hku nna hpaji sharin ya wa sai jawng Sara/saranum ni hpe chyeju dum ai shagrau sha-a mayu ai hku nna myit makun let ndai lamang hpe galaw ai lam Laiza jawngma dingsa Komiti a ningtau ningbaw Saranum Washa Nang Zin tsun ai.
Anhte jawngma ni mung Sara/saranum ni hpe lak san rai nna shagrau sha-a ai lam, sa jahkrum ai lam nlu galaw ai majaw, moi rau shakut shaja lai wa sai jawng Sara/saranum ni mung rau hkrum zup let shagrau sha-a ai hpawng lamang hpe jawm galaw ai rai nna, madung gaw Sara/saranum ni hpe shagrau sha-a ai hpawng lamang galaw mayu ai marang e Laiza jawngma dingsa Komiti hpe 2017 ning kaw nna hpaw ninghtan wa ai re lam saranum matut tsun ai.
Laiza jawng magam gun sara/saranum ni yawng marai 70 jan hpe shagrau sha-a ai lam galaw ai rai nna, matut nna 2011 ning hpang daw de na jawng Sara/saranum ni hpe shagrau sha-a ai lam galaw sa wa na re lam chye lu ai.
Matut nna galaw sa wa na masing hta jawngma dingsa hpung a yaw shada lam 4 rai nga ai Sara/saranum ni hpe dang di dang dep ai ram garum shing tau lu na matu, Hpaji lam hta shakut shaja nga ai hpaji lam hta myit lawm tim, ning tawn tim yak hkak nga ai jawngma ni hpe garum madi shadaw lu na matu, jawng hta laika hpaji sharin ai hta ra nga ai lang rung lang rai ni hpe madi shadaw mat wa lu na matu hte grau grau nna hpaji chye kung kyang ai amyusha ni byin tai wa lu na matu shakut shaja galaw sa wa na re lam chye lu ai.
Dai ni na hpawng lamang hta mungshawa ni yawng marai 200 daram sa du shagrau lawm ai lam chye lu ai.
