1st Miss Tsai Lat 2020 tsawm shayi lata poi lamang galaw

Machya Entertainment kaw nna woi awn nhtawm, 1^st Miss Tsai Lat 2020 tsawm shayi lata poi lamang hpe February 14 ya shana Laiza Muklum, Sinpraw Majoi Gawknu kaw galaw ai lam chye lu ai.

“Tinang hkum hpe manu shadan let kaja ai lam kaw jai lang sa wa lu na matu, hkum hkrang san seng hkamja na matu, ganawn mazum lam hta pri nyem ai hku tsun shaga chye na matu, tinang a amyu hte Htunghking hpe htawng madun lu ai shayi sha ni tai wa lu na matu hte laika hpaji hpa rat machye machyang hte san seng tsawm htap ai gawng shing yan ni hpring tsup yang she manu dan ai Miss langai byin tai lu na re lam, mungkan hte shing rau chya lu ai amyu shayi tai lu na matu yaw shada let galaw ai re” nga nna Machya Entertainment Ningbaw Sara Sabaw Naw Sam tsun ai.

Shingjawng lamang hta jarit mayan hkan na ramma shayi sha ni marai 16 shang lawm shingjawng ai rai nna, 1^st Miss Tsai Lat 2020 tsawm shayi Winner hpe Je Yang Hpyen yen Dabang kaw na Shayi Roza Labang Ji San, 1^st Runner Up hpe Laiza lawk (1) Nawng E-hku kaw na shayi Hpaudaw Htang Dim hte 2^nd Runner up hpe gaw Laiza lawk 2 kaw na shayi Nan Wut Mung ni lu la mat ai rai nna, Winner lu mat ai tsawm shayi hpe Crown hte gumhpraw kyats 150,000 (Sen Shi Manga) shagrau ai lam 1^st runner hte 2^nd runner hpe gaw nampan shabawn hte Crown shagrau jaw ai lam chye lu ai.

Shingjawng poi hta First Miss Tsai Lat 2020 tsawm shayi Winner, 1^st runner hte 2^nd runner up lu ai ni gaw Myitkyina Univers, Miss International shingjawng lamang hta shang lawm shingjawng sa wa na re lam chye lu ai.

Jarit mayan hta shanu nga ai ramma kanau kasha ni, ya kaba wa ai shingni hta myit lawm ai ma ni hpe shalat shapan ai magam bungli hpe galaw na matu Machya Entertainment hpe hpaw ninghtan da ai rai nna, kade nna yang gaw asak 18 ning npu na ni hpe Mahkawn Idol shingjawng ai lamang ni, hkrang shala ai lamang ni hte kaga hpan amyu myu hku nna mung matut manoi galaw sa wa na re lam chye lu ai.