(2) lang na Manmaw Ginwang JLH magam gun ni a bawngban hpawng galaw

(2) lang na Manmaw Ginwang, Jinghpaw Wunpawng Htunghking Hte Laili Laika Hpung (JLH) magam gun ni a bawngban hpawng hpe April shata 26 ya jahpawt hkying 9:00am aten hta Aungtha Manau Wang kaw galaw la lu sai lam chye lu ai.

Bawngban hpawng hta gawgap nga ai manau shadung kaw, alu ja gumhpraw jaw ya ai alu madu ni a mying ni, gawgap ai lam hta jai lang mat wa ai ni hte manau shadung a, htunghking maka lam ni hpe JLH Ningbaw, Salang Hpaulu La Wawm kaw nna sang lang dan ai.

Matut nna du wa na 2023 ning November shata hta ya galaw la ngut sai manau shadung hpaw poi hte Manmaw Ginwang ni a nlung nnan chyeju shakawn manau poi hpe galaw na matu, hpawng hta du sa ai datkasa ni hte atsawm dawdan la lu sai lam, Salang wa tsun ai.

Hpawng hta Manmaw Ginwang kata na buga ninhtawn kaw na du sa ai laksan datkasa marai 12, ginwang ginra na Salang ni, makam masham hpung Sara ni, ginwang num hpung Salang ni sa du shang lawm bawngban ai lam chye lu ai.