2008 gaw da tara gram sharai lu na matu mungshawa ni madi shadaw hpawng galaw

2008 gaw da tara hpe gram sharai lu na matu NLD ni woi awn nhtawm, mungshawa kanu kawa ni hpe shaga la nna Hpakant Mawwan nlung shadaw masat pa kaw April shata 3 ya jahpawt hkying 10:00am aten hta mungshawa madi shadaw hpawng galaw ai lam chye lu ai.

“Hpawng hta tsun ai gaw 2008 gawda ai tara hpe byeng ga, hpa majaw nga yang 2008 ning gawda ai tara ndai gaw hpyen hku nna sha tara up hkang taw ai re majaw mungshawa ni ra sharawng ai NLD asuya ni woi awn ai aten hta 2008 ning gawda ai tara hte yawng hpe shagyip shanyem ai lam ni galaw taw nga ai re majaw, mungshawa ni mara tawn ai NLD asuya galaw nga ai aten hta Myen Mung mungshawa yawng wanglu wanglang, lula ging ai ahkaw ahkang hpe lu la hkra jawm galaw ga, 2008 ning gawda ai tara sha pat shingdang taw ai majaw ” nga nna sanglang dan ai lam, hpawng hta sa shang lawm ai Saranum Lahtaw Kai Ring tsun ai.

Dai ni na hkaw tsun hpawng hta sa du shang lawm ai mungshawa ni yawng marai 500 daram re lam chye lu ai.