2016-2017 hpaji ladaw hkai rem jawng yu hpawng galaw

Wunpawng Mungdan Shanglawt Asuya, Hkai Rem Magam Dap a 2016-2017 ning hpaji ladaw hkai rem jawng yu hpawng hpe March 31 ya jahpawt hkying 09:00am aten hta Laiza

Alen Bum, Hkai rem jawng gawknu hta galaw ai lam chye lu ai.

Jawng yu ai jawngma ni gaw masat yan 3 na lahta tsang Diploma la ai marai 5, masat yan 14 ningpawt ninghpang lawu tsang jawng yu ai jawngma marai 13, yawng marai 18 re hpe chye lu ai.

Jawng kaw lahta tsang lawu tsang pang lahkawng  garan da ai lam nga ai, tsang 10 awng ai ni hpe pangmi, tsang 10 n awng, tsang 8 a lahta na ni hpe pangmi ningpawt ninghpang ngu nna shata 10 hkai rem hpaji ni hpe sharin ya ai, tsang 10 ang sai ni hpe gaw Diploma jaw ai, tsang 10 n awng tim ningpawt ninghpang hta ningtawn ai ni hpe lahta tsang Diploma matut lung na ahkang jaw ai lam, Diploma hta ningtawn ai ni hpe gaw hkai sun dakkasu janmau jaw na masing nga ai lam hpe, hkai rem jawng up sara kaba Kareng Brang Seng tsun ai kawn chye lu ai.

Hkai rem hpaji jawng hpe Wunpawng Mungdan Shanglawt Asuya KIO Hpaji masa komiti kawn madung lit la hpaw nna NGOs uhpung ni mung garum madi shadaw lawm ai lam hpe mung chye lu ai.

Ndai hkai rem jawng hpe lai wa sai 1997 ning, Mai Ja Yang Wungau Bum kaw na hpaw hpang wa ai hta dai ning 2017 ning du hkra rai yang ningpawt ninghpang jawng ma marai ( 225 ) hte Diploma jawng ma marai ( 32 ), yawng marai ( 257 ) hpe shalat la lu sai lam hpe chye lu ai.