2019-2020 hpaji ladaw Journalism Diploma lakmat shagrau hpawng galaw
Wunpawng Mungdan Shanglawt Asuya, Mai Ja Yang Amyusha Hkawlik kaw nna shawng nnan hpaw sharin ai 2019-2020 hpaji ladaw Journalism Diploma lakmat shagrau sha-a hpawng hpe September shata praw 4 ya shani hkying 1:00pm aten hta Mai Ja Yang Amyu Sha Hkawlik kaw galaw ai lam chye lu ai.
Hpawng hta nawku daw jau ai lamang ni galaw ai re sha n-ga, dai ni jawng yu ai jawngma ni marai 12 hpe jawng yu lakmat shagrau shagrau sha-a ai lam galaw ai re.
Hpawng lamang hta Sara Kaba Aung Naing kaw nna dai ni jawng yu ai jawngma ni hpe online hku nna shatsam mungga tsun ai hta, “Ndai hpaji hte tinang a kan bau bungli galaw ai lam hta raitim, myu hte mungdan a matu bungli galaw ai lam hta raitim mung, grau nna shakut shaja hkaja ra na hte ya aten galai shai nga ai prat masa hpaji ni hpe matut manoi hkaja shakut shaja ra na re” nga nna tsun ai.
Mai Ja Yang Amyusha Hkawlik Jawng Up Saranum Kaba Nangzing Lu Awn kaw nna mung, shisawk hpaji hpe sharin hkamla ngut sai jawngma ni yawng mung tinang a Magam Dap tinang a bungli de shang wa ai shaloi, ndai hpaji gaw wunpawng amyusha ni yawng hpe akyu jaw ai hpaji re ngu ai hpe kam ai, matut nna laika hpaji hku, tatut mahkrum madup hku nna mung machye machyang hkum tsup sai ni kaw nna san htai hkaja la na matu n-gun jaw dat mayu ai re nga nna tsun ai.
Daini jawng yu ai jawngma ni gaw Journalism Diploma jawng hpe 2019 ning July shata kaw nna shata 10 tup shiga hte seng ai hpaji ni hte kaga chye ging chye mai hpaji ni hpe sharin hkaja ngut nhtawm, daini jawng yu shagrau lakmat hpe shagrau hkamla ai re lam chye lu ai.
Photo Credit; Maureen Tsin Tsin
