2019 ning, shaning ninghpaw chyeju shakawn wunli la akyu hpyi hpawng galaw

Laksan Laiza Muklum Pati Komiti kaw nna woi awn nhtawm, 2019 ning, shaning ninghpaw wunli la akyu hpyi hpawng lamang hpe January 5 ya jahpawt hkying 8:00am aten hta Zup Awng Simsa Ginsup Pa hta galaw ai lam chye lu ai.

Wunli la akyu hpyi ai lam hte seng nna Laksan Laiza Muklum Pati Komiti Amu Madu Salang Kaba Lasi Naw Htoi Ja kaw nna ya na zawn tsun ai.

Anhte Wunpawng Myusha ni gaw Karai Kasang kaw manoi manat nga ai Hkristan ni re majaw, makam masham hpe baw tawn nna magam bungli galaw sa wa ai lam re. Mungchying mungshawa ni hte magam gun ni myit mang hkrum let, magam bungli ni hpe galaw sa wa ra ai ngu ai lachyum hpe shapraw ai lam re, nga nna Salang Kaba tsun ai.

Wunli la akyu hpyi hpawng hta Laiza Muklum kata nga ai Amyu n-ginghka ai makam masham n-ginghka ai mungshawa ni hte laksan saw shaga ai manam ni yawng marai lanit tsa daram sa du shanglawm ai lam chye lu ai.