2021 shaning ninghpaw chyeju shakawn wunli la akyu hpyi hpawng galaw
2021 shaning ninghpaw chyeju shakawn wunli la akyu hpyi hpawng hpe Laiza Muklum Padang Rung Gawknu kaw January shata praw 1 ya jahpawt hkying 7:00am aten hta galaw la lu sai re.
Hpawng lamang hta, makam masham hpung shagu na nawku hpung woi sara ni kaw nna, mara raw akyu hpyi ya ai lam, 2020 shaning hkam la lu sai chyeju nlang hpe shakawn ai hte 2021 shaning ting a matu akyu hpyi shaman ya ai lam galaw ai.
Wunpawng Mungdan Shanglawt Hpung, Ginjaw Komiti Tingnyang Up Du Daju Jum Nban La a 2021 shaning ninghpaw shatsam mungga hpe Sara Kaba Kumhtat Hting Nan (Ginjaw Komiti Ninggawn Amu Madu) kaw nna hti htawn ai lam galaw ai re.
2021 ning shaning ninghpaw chyeju shakawn wunli la akyu hpyi hpawng hta, Ginjaw Komiti Salang ni, Magam Dap, Makan Dap kaw na saw shaga da ai magam gun ni, Amyu Shayi Hpung Ginjaw magam gun ni hte Padang Rung magam gun ni sa du shang lawm ai rai nna, lamang hpe Ginjaw COVID-19 Ana Zinli Makawp Ninghkap Komiti a rit kawp tara hte maren galaw la lu sai re.
