2022-2024 ning a Man Je ninghtawn Jinghpaw Wunpawng Laili Laika Hte Htunghking Hpung ningbaw ni hpe ra lata shagrin hpawng galaw
2022-2024 ning a Man Je ninghtawn kata na Jinghpaw Wunpawng Laili Laika Hte Htunghking Hpung ningbaw hte amu madu lata san ai hpawng hpe January shata 22 ya jahpawt hkying 10:00am aten kaw nna shana daw hking 3:00pm aten du hkra, Man Je Kawng Ra Lawk Htunghking Rung kaw galaw ai lam chye lu ai.
Ningbaw magam lit hpe Salang Labang Naw Grawng, ningtau ningbaw (I) Salang Lahpai Gum Ja Tu, (II) Salang Labang La Wawm, amu madu magam lit hta Salang Labang Tu Lum, ningtau amu madu (1) Hpt. Maran Nang Awng (II), Jan. Mahka Hkawn San, kunhting lit hpe Duwa Chyauhpa La Ja ni rai nna, sindan pa ra lata ladat hte galaw ai re lam, Man Je mare na salang langai tsun ai.
Mu gun ladaw gaw 3 ning rai nga ai, ya gun nga ai ni gaw 4 ning jan pyi rai mat nga ai dai majaw ya she bai lu lata ai, bungli ap ya ap la hpawng hpe galoi galaw na re atsawm n chye shi ai lam, salang wa matut tsun ai.
Hpawng lamang hta saw shaga da ai kanu kawa myitsu salang ni yawng marai 50 daram sa du shang lawm ai hte galaw la lu sai re hte Man Je ninghtawn kata hta Jinghpaw Wunpawng kahtawng mare 80 daram nga ai lam chye lu ai.
