2023-2024 ning hpaji ladaw hta ningtawn ai jawngma ni hpe scholarship jaw sa wa na
Alen Bum Lahta Tsang Jawng a 2023-2024 ning hpaji ladaw awng jawngma mying jahpan hpe February shata 29 ya shani shapraw sai hta ningtawn ai jawngma ni hpe du wa na hpaji ladaw kaw nna, scholarship jaw sa wa na re lam chye lu ai.
2023-2024 ning hpaji ladaw hta sharin ginhpan 5 hta jan na ning tawn ai jawngma ni hpe du wa na hpaji ladaw kaw nna, scholarship jaw sa wa na re lam, Alen Bum Jawng Up, Sara Kaba Maru Hkawng Lum tsun ai.
Jawngma ni hpe scholarship jaw ai a yaw shada lam gaw “Anhte kaw e du sa wa ai jawngma ni law malawng gaw, langai hte langai grai yakhkak ai ni lawm ai, dan re majaw ayak ahkak re jawngma ni jawng lung ai lam hta grau na maju jung lung lu na matu, laika shakut ai jawngma ni laika grau na shakut lu na matu, scholarship jaw ai a maran e kaga jawngma ni mung grau na hpaji lam hta shakut lu na matu re” nga nna tsun ai.
Scholarship jaw ai hta tsang kade nga na masat da ai lam nnga ai, masat da ai shadang kaw du ai jawngma ni kadai hpe raitim jaw sa wa na rai nna, du wa na hpaji ladaw hta scholarship jaw na jawngma yawng marai (22) re lam, Sara Kaba matut tsun ai.
Scholarship lu ai jawngma ni gaw, border nga ai ni rai yang border manu nbang ra ai, jawng lung ai ni mung jawng shabrai nbang ra na rai nna, jawng lung nga ai aten hta anhte masat da ai ginhpan hta nhkrat hkra matut na shakut taw nga ai jawngma ni hpe shata hku na lak san garum gumhpraw ni hpe jaw mat wa na re lam chye lu ai.
Lai wa sai shaning hta tsang (9) ni hpe ningtawn ai ginhpan hta hkan nna, (1) to (3) shang ai jawngma ni hpe scholarship jaw ai lam ni nga lai wa sai lam chye lu ai.
Matut nna, Alen Bun lahta tsang jaw hta shaning hte shaning jawng lung ai jawngma law wa ai hta hkan nna, tsang (9), (10) jawngma ni hpe Alen Bum jawng kaw sharin nhtawm, lapran tsang jawngma ni hpe Dum Bung jawng kaw garan sharin taw nga ai lam chye lu ai.
Alen Bum lahta tsang jawng gaw, lai wa sai 2011 ni hta KIA hte gumshem Myen hpyen dap lapran gasat gala majan byin wa ai hta Wunpawng Mungdan Shang Lawt Asuya kaw nna woi awn let, asak aprat ram ai ramma ni hpaji lam hta nhkrat sum na matu, yaw shada let hpaw sa wa ai jawng re hpe matut chye lu ai.
