( 39 ) ning hpring Wunpawng Mungdan Shanglawt Amyu Shayi masat ninghtoi hpawng galaw
Wunpawng Mungdan Shanglawt Amyu Shayi Hpung a ( 39 ) ning hpring masat ninghtoi hpawng hpe, August 19 ya shani hkying 10:00am aten hta Laiza Muklum Sinpraw Majoi manau wang gawknu kaw galaw ai hpe chye lu ai.
KIO Ginjaw Komiti Ningtau Ninggawn Amu Madu Salang Kaba Labang Doi Pyi Sa kaw na, “ Wunpawng amyu shayi ni a galai shai rawt jat galu kaba wa na lam hpe amyu shayi ni a chyena hkapla hkan sa galaw shakut shaja sa wa na atsam marai gaw, madung lit kaba rai nga ai. Htunghking hte dip tawn da ai, htunglai hte dip tawn da ai, Gumchying Gumsa hpe rawt malan kau ai KIO Ginjaw Komiti gaw, Amyu Shayi ni a hkumpat shingdang hkrum ai kaw na lawt lu na matu, amyu shayi ngu nna masat ya sai. Amyu shayi ni tinang a, ahkaw ahkang hpe e, gaw gap la na matu lit jaw ai lam re.” nga nna n-gun jaw shatsam mungga shaga ai.
Hpawng hta du sa ni gaw, mungshawa tsi rung sara/num ni, hpaji jawng sara/num ni hte Ginjaw Amyu Shayi Hpung ni yawng marai 296 tup sa du shanglawm ai hpe chye lu ai.
Wunpawng Mungdan Shanglawt Amyu Shayi Hpung hpe, laiwa sai 1978 ning August shata 19 ya shani KIO Ginjaw Komiti kaw nna tara shang hpaw masat ya ai re. Ndai masat hpawng hpe Ginwang Ginjaw hte Ginwang Daw shara ni hta mung, galaw ai lam na chye lu ai.
