4 lang ngu na WMR mugun salang ni a E.C hkumra zuphpawng hte 2019-2023 ning, numdaw 5 ngu na, mugun salang ningnan lata ai zuphpawng galaw
4 lang ngu na WMR mugun salang ni a E.C hkumra zuphpawng hte 2019 – 2023 ning, numdaw 5 ngu na, mugun salang ningnan lata ai zuphpawng kaba hpe Myitkyina Muklum, Shatapru, Wunpawng Amyusha Mungbawng Ramdaw ( WMR ) rung nta hta June shata praw 5 kaw nna praw 6 lahkawng ya tup ginra shagu na WMR salang yawng 230 daram sa du shang lawm bawngban la lu sai lam chye lu ai.
“Mugun salang ningnan lata ai zuphpawng hta dat kasa ni tang madun wa ai report ni hpe tara ningnan kaw nna galaw wa na re. Dai hta aten ladaw kadun galu garan da ai lam ni nga ai. Aten ladaw kadun ngu ai hta amyu sha gahkyin gumdin lam hpe shawng numshawn shaw nna galaw sa mat wa na rai nhtawm, amyu sha lawt lam magam bungli hpe lahkrip ra ra galaw sa wa na ngu ai ginlam ni mung lawm ga ai” nga nna Salang Hkawn Zau Jat tsun ai.
Salang Hkawn Zau Jat matut tsun ai hta “Anhte WMR hpaw ai gaw shaning 10 ning jan rai sai raitim mabyin masa lam yan amyu myu a majaw Myu kata de wang lu wang lang nmai galaw ai lam ni nga ai raitim masa langai mi galai shai wa ai re majaw du wa na tara ningnan kaw na gaw shajin da ai hkyen da ai lam ni hpe apnawng shang lawm wa ai hte mai byin ai made lu ai ahkaw ahkang hte galaw mat nna gahkyin gumdin lam hpe makai hkak ai lam, anhte kata kaw lu galaw mat hkra htep lahti hte myusha lam yan hta galaw wa na re. Bai nna ginra report ni hta lung wa ai manghkang ni hpe mung wunkat hpaw nna galaw na hkyen ai re” nga nna tsun ai.
Hkrumzup bawngban hpawng hte mugun ningnan galai ai zuphpawng hta ginra shagu na WMR salang ni sa du shang lawm nna 2019-2023 ning aten ladaw 4 ning du hkra mu gunhpai sa wa na WMR mu gun ningnan ni gaw, ningbaw magam lit hpe Tara Kasa Salang Lashi La rai nna, Amu Madu magam lit hpe gaw Salang Hkawn Zau Jat ni hpe lata galai san da lu sai hte du wa na June shata 18-19 ya shani hta gaw bungli galai ap ya ai lamang hpe galaw na re ai.
WMR a Ninghpum Salang ni gaw, Rev. Dr Hkalam Samson ( KBC ningbaw ), Wa Saradaw Francis Daw Tang, Sara Ningla Shawng, Saranum Kaba Lahpai Ja Nan, Bishop Zau Li, Sara Zahkung David, Saranum Kaba Ja Tawng, Du Wa Hkun Seng hte Saranum Hkawn Bu ni yawng marai 9 re ai lam chye lu ai.
Photo: WMR
