(41) ning hpring Wunpawng Mungdan Shanglawt Amyu Shayi masat ninghtoi hte shagrau sha-a hpawng galaw
( 41 ) ning hpring Wunpawng Mungdan Shanglawt Amyu Shayi masat ninghtoi hte shagrau sha-a lakmat jaw ai hpawng hpe Laiza Muklum, Sinpraw Majoi Gawknu kaw August shata 19 ya jahpawt hkying 10:00am aten kaw nna shani ka-ang hkying 12:30pm aten du hkra galaw ai lam chye lu ai.
Hpawng lamang hta nawku hpung woi sara ni akyu hpyi ya nhtawm, Myusha Dawnghkawn hpe hkungga jaw ai lam galaw ai. Amyu Shayi Masat Ninghtoi Mungga hpe Hpawmi Marip Kai Htang ( Laksan Laiza Muklum Amyu Shayi Komiti Ningbaw ) kaw nna hti dan ai.
Dai hpang Amyu Shayi Hpung Ginjaw, Ginwang Ginjaw, Laksan Laiza Muklum hte Ninghtawn mare hkan Amyu Shayi magam bungli kaw magam gun 10 ning hpring ai Amyu Shayi marai 14 hpe masat masa gumhpraw kachyi hte shagrau sha-a laika pa hpe jaw ai lam galaw ai.
Shagrau sha-a hkam la sai ni hpe Hpawmi Nangzing Kaw Hpang (Wunpawng Mungdan Shanglawt Amyu Shayi Hpung Ginjaw Komiti Ningbaw) kaw nna n-gun jaw shatsam mungga tsun ai hta, ngai gaw 10 ning hpring masat shagrau kumhpa lu la sai, ndai hte galaw yang ram sai ngu nmai myit kau ai, shagrau sha-a hkam la sai kaw na gaw amyu  shayi ni hpe matut nna gara hku rawt jat wa hkra woi galaw na kun? Anhte amyu ni hpe gara hku na shalawt woi na kun? Ngu ai myit masin hta ya kaw nna ninggam langai bai myit jat wa ra sana re, nga nna tsun ai.
Salang Kaba Labya Tang Gun ( Mungchying Uphkang Dap Lithkam ) kaw nna mung, CHANGE ngu ai English laika hkum langai hte langai a lachyum ni hpe hpaji jaw shatsam mungga tsun ai. Hpawng hta Magam Dap, Makan Dap na kanu kawa Amyu Shayi ni, mare buga na kanu kawa Amyu Shayi ni yawng marai 800 jan du sa ai lam chye lu ai.
