(45) lang na Wunpawng Mungdan Shanglawt Amyu shayi masat ninghtoi hte shagrau sha-a hpawng lamang galaw
(44) ning hpring (45) lang na Wunpawng Mungdan Shanglawt Amyu shayi masat ninghtoi hte shagrau sha-a hpawng hpe August shata 19 ya shani hkying 9:00am aten hta Sinpraw Majoi Gawknu kaw galaw ai.
Masat ninghtoi hpawng hta Wunpawng Mungdan Amyu Shayi Hpung Ginjaw Komiti Ningbaw, Hpawmi Nangzing Kaw Hpang a shatsam mungga hpe Amyu Shayi Ginjaw Komiti Ningbaw Malai (l), Hpawmi Lahpai Seng Raw hti shalai ya ai hta “Covid-19 ana zinli hte mung masa a majaw galaw lu galaw sha, tamlu tamsha dut dang wa ai, Myen gumhpraw manu ndan wa ai, kunrai manu lani hte lani rawt wa ai majaw, dinghku shagu yak hkak dut dang lam law law a lapran e asak hkrung lu na matu, shakut shaja nga ai ni hkrai rai nga ai hpe myit dum ai, lai wa sai lahkawng ning hta Covid-19 ana zinli a majaw rau hkrum zup hpawng chyawm ai lam nlu galaw ai raitim, dai ni gaw amyu shayi masat ninghtoi shagrau hpawng hpe galaw lu shaga ai majaw karai kasang a chyeju hpe shakawn nga ga law” nga ai.
KIO Ginjaw Komiti Ninggawn Amu Madu Sarakaba Kumhtat Hting Nan kaw nna, Amyu shayi ni hpe n-gun jaw shatsam mungga shaga ai hta “Dai ni mungkan ntsa kaw shinggyim masha hpe hpan tawn da ai hta num hte la ngu hpan tawn da ai shaloi, karai kasang gaw Amyu shayi rai nga num ni hpe, nu num ni hpe lak lai ai shaman chyeju jaw da ai hku re, Amyu shayi ni hta atsam marai ningja ni, amyu shadang ni hta grau nna, jaw da ai lam ni law law anhte mu lu ai, sharin la lu ai lam law law nga ai, chyum laika hta rawng ai labau ni hpe yu ai shaloi mung karai kasang gaw bungli kaba galaw na rai sai nga jang, amyu shayi ni nu num ni hpe she jai lang ai hku re” nga nna tsun ai.
Dai ni na masat ninghtoi gaw 5 ning hpring, 10 ning hpring hte 20 ning hpring Amyu shayi magam gun sai marai (108) hpe shagrau sha-a ai lamang mung rai nna, Magam Dap Makan Dap na magam gun kaji kaba ni yawng marai 1100 jan sa du shang lawm let galaw la nhtawm, masat ninghtoi hpe Sha-it Yang, Woi Chyai, Je Yang hte Hpunlum Yang hpyen yen dabang ni hta mung galaw ai lam chye lu ai.
