4th lang na Amyusha Hpaji Dakkasu Institute of Education, jawng yu janmau lakmat shagrau hpawng galaw
Wunpawng Mungdan Shanglawt Asuya Ginjaw Hpaji Dap kaw nna hpaw tawn ai Amyusha Hpaji Dakkasu Mai Ja Yang Institute of Education, ( MIEd ) a 4th lang na jawng yu janmau lakmat shagrau hpawng hpe May shata 17 ya shani hkying 10:00am aten hta Mai Ja Yang Mungshawa Gawknu kaw galaw ai lam chye lu ai.
Dai ni jawng yu ai hta Diploma in Education na marai 64, Diploma in TESOL na marai 19, Pre-college Graduates na marai 171 hte short course hku nna lakmat shagrau hkamla ai marai 37 yawng marai 291 tup re.
MIEd jawng hta sharin ya nga ai lamang ni gaw Pre-College Program hpe laning mi, Diploma in Education Program hpe lahkawng ning, Diploma in TESOL Program lahkawng ning ni hpe hpaw sharin nga ai rai nna, 2017-2018 jawng lung ladaw kaw nna Primary Teacher Training Short Course hpe bai hpaw sharin nga ai re lam, MIEd a hpaji lam sumtang kaw na chye lu ai.
Pre-College gaw tsang 10 awng ai hpang lung ai rai nna madung sharin ya ai ginhpan ni gaw English Listening and Speaking, English Reading and Writing, English Vocabulary, English Grammar, Chinese Listening and Speaking Chinese Reading and Writing, Chinese Grammar, Social Studies, Basic Computer ni hte madum sumhpa, music, hkrang pan, nampan mawn ai ni hpe sharin ya nga ai re.
KIO Ginjaw Komiti Tingnyang Up Malai II Sara Kaba Sumlut Gam kaw nna mung, janmau shagrau hkamla sai jawngma ni hpe n-gun jaw mungga shaga ai lam chye lu ai.
Jawng yu hpawng hta magam dap, makan dap na kanu kawa ni, laksan saw shaga da ai manam ni hte jawngma kanu kawa ni yawng marai 1000 daram sa du shanglawm ai lam chye lu ai.
