5 lang na WMR mu gun ladaw a ginra dat kasa E.C hkumra zuphpawng galaw
5 lang na Wunpawng Amyusha Mungbawng Rapdaw (WMR) mu gun ladaw a ginra dat kasa E.C hkumra zuphpawng hpe November shata 13-14 ya laman Myitkyina Shatapru, WMR Rung kaw online zoom meeting hku galaw la lu sai lam na chye lu ai.
Ndai zuphpawng gaw du wa na 2021 ning hta galaw sa wa na WMR a bungli masing ni hpe tau hkyen bawngban dawdan ai zuphpawng re lam, WMR tsun ahkang lu Sara Nhkum Tang Gun tsun ai.
“Du na 2021 ning hta WMR a bungli masing ni, WMR dap komiti a bungli masing ni, badget ni, ginra de na tang madun ai lam, dawdan ra ai lam ni hpe dawdan shagrin ai rai nna, laning mi na bungli masing hte badget masing masa ni hpe jawm shagrin la ai zuphpawng re” nga nna tsun dan ai.
“Wunpawng Amyusha Mungbawng Rapdaw ngu ai hpe Wunpawng amyusha ni law malawng chye na hkawn hkrang wa na matu, Wunpawng Amyusha Mungbawng Rapdaw kaw nna Wunpawng amyusha ni a magam bungli ni hte rawt jat galu kaba wa na lam ni, mungmasa lam, myusha lam ni ma hkra hpe jawm myitmang galaw nga ai re majaw, mungshawa ni yawng chye na wa lu hkra hte shanglawm wa lu na matu mung, ndai zuphpawng hta shanglawm jahkrup ai re lam” Sara matut tsun ai.
WMR mu gun ladaw a ginra dat kasa E.C hkumra zuphpawng hpe laiwa sai shaning hta WMR rung kaw yawng du zup nna galaw ai raitim, daining gaw COVID-19 ana zinli a majaw, zuphpawng hpe WMR ninghpum salang ni, mungmasa ningbaw ningla ni, ra lata san da hkrum ai ninghkring salang ni hte Myen Mung ting na ginra dat kasa salang ni kaw nna online hku shanglawm let, online zoom meeting hte galaw la lu sai re.
WMR mu gun ladaw 4 ning re ai hta, ginra dat kasa E.C hkumra zuphpawng hpe laning mi hta kalang galaw ai rai nna, zuphpawng galaw ai ndai lang hte rai yang 5 lang du sai lam chye lu ai.
