52 lang na Jinghpaw Wunpawng Chyum Hkawlik jawng yu hpawng galaw
KTC, Kutkai Chyum Hkawlik a 52 lang na jawng yu hpawng hpe Kutkai Chyum Jawng Wang kaw March shata 5 ya shani hkying 10:00am aten kawn shana daw hkying 2:00pm aten du hkra galaw ai lam chye lu ai.
Jawng yu hpawng hta KTCS Nawng Nang Chyum Jawng na Ningtau Jawng up Rev. Dr. Maru Brang Seng kaw nna Karai mungga hte sa du n gun jaw ai. Dai ni na jawng yu ai hta Certificate of Theology (C.Th), Licentiaten of Theology (L.Th), English, Bachelar of Theology (B.Th), Bachelar of Ministry (B.Min), Diploma in Agriculture and Livestock Program (APL)-Hkairem, Diploma in Church Music hte English program na jawngma yawng marai 146 re nga nna Kutkai Chyum Jawng a sharin Sara Rev. Maran Zau Bawk tsun dan ai.
Kutkai chyum jawng yu nna buga de ten hpring magam wa gun ai 25 ning hpring hte 40 ning hpring magam gun ai ni hpe mung Jubali dazik hte shagrau masat laika pa jaw ai hta 25 ning hpring magam gun marai 1, 40 ning hpring magam gun marai 5 re lam chye lu ai.
Nambat 1 ningtawn ai jawngma ni hpe laksan “Award” shagrau ai lam mung galaw ai. Hpungtau Duwa Tangbau Gam a kasha ni hku nna laiwa sai 3 ning 300 aten hta nnga mat wa sai Kasha Tawm Nu hpe masat shagrau ai hku nna Tawm Nu Award ngu masat ai, ndai kumhpa gaw music hte Chyum hpaji hta ningtawn ai marai 2 hpe shagrau ai re.
Music hta ningtawn ai wa gaw Lasang San Awng, Chyum hpaji hta ningtawn ai wa gaw Tangbau Merry Seng Ja yan shagrau hkrum ai lam chye lu ai.
Nambat 2 gaw KBC Ramma Dap kaw nna, Doctor Ola Hanson Award mying hte shagrau ai lam galaw ai hta B.Th pang kaw na awng pru ai Lagwi Zung Nu ( Sinpraw hkran Miwa mung jarit ) shagrau hkum ai re.
Nambat 3 gaw jawng ting na kasi kaja tai ai kumhpa hpe Mai Ja Yang maga de na Nhkum Kai Htang shagrau hkrum sai re. jawng yu hpawng hta sa du shang lawm ai mungshawa ni yawng marai 1000 mi jan sadu shagrau lawm ai lam chye lu ai.
