( 57 ) lang na rawt malan masat ninghtoi hpawng hte magam gun ni hpe shagrau sha-a lam galaw

Wunpawng Mungdan Shanglawt Hpyen Dap a ( 56 ) ning hpring, ( 57 ) lang na Mungshawa Rawt Malan masat ninghtoi hpawng hpe Laiza Muklum, Padang Hkrun Lam Majan Masing Woi Awn Rung Gawknu hta February praw, 5 ya jahpawt hkying 7:00am aten hta galaw ai lam chye lu ai.

Zuphpawng lamang hta nawku hpung woi sara ni Karai Kasang kaw akyu hpyi ya ai lam, Myu Sha Dawnghkawn hpe hkungga jaw ai lam, asak apnawng mat wa sai share shagan ni hpe

hkungga jaw ai lam, KIO Tingnyang Up Salang Lanyaw Zawng Hra a ( 57 ) lang na Rawt Malan masat ninghtoi mungga hpe Du Up Daju Maran Zau Tawng kaw na hti shalai ai lam hte Shanglawt Magam gun ladaw ( 50 ) ning, ( 40 ) ning, ( 30 ) ning, ( 20 ) ning, ( 10 ) ning, hpring ai magam gun ni hpe shagrau sha-a galaw ai lam nga ai, zuphpawng hta du sa ai mungshawa hte magam dap, makan dap na magam gun yawng marai ( 700 ) jan shang lawm ai lam chye lu ai.

( 57 ) lang na Rawt Malan Masat Ninghtoi hpe Wunpawng Mungdan shara shagu hte Maigan kaw du nga ai Wunpawng amyu sha ni mung galaw nga ai lam na chye lu ai.

Wunpawng Mungdan Shanglawt Hpyen Dap KIA hpe, lai wa sai 1961 ning February praw, 5 ya shani hta hpaw hpang dat ai re lam chye lu ai.