( 58 ) lang na rawt malawn masat ninghtoi zuphpawng hte magam gun ladaw ( 50, 40, 30, 20, 10 ) ning hpring ai ni hpe shagrau sha-a lamang galaw
February praw 5 ya jahpawt hkying 8:00am aten Laiza Muklum Padang Hkrunlam Majan Masing Woi Awn Rung gawknu kaw ( 58 ) lang na rawt malan masat ninghtoi zuphpawng hte magam gun ladaw ( 50 ) ning, ( 40 ) ning, ( 30 ) ning, ( 20 ) ning, ( 10 ) ning hpring sai magam gun ni hpe shagrau sha-a lamang galaw ai hpe chye lu ai.
Zuphpawng hta nawku hpung woi sara ni kaw nna, akyu hpyi ya ai hte amyusha dawnghkawn hpe bawgum hkungga jaw ai lam, mungdan hte mungdan sha ni a ntsa asak ap nawng mat wa sai share shagan ni hpe hkungga jaw ai lam galaw ai.
( 58 ) lang na rawt malan mungga hpe Wunpawng Mungdan Shanglawt Hpung Ginjaw Komiti Tingnyang Up, Wunpawng Mungdan Shanglawt Kongsi Ningbaw Kaba Du Duju Jum Nban La kaw nna mungga shaga ai. Dai hpang magam gun ladaw ( 50 ) ning hpring sai ni hpe, Ja dazik hte shagrau masat laika pa jaw ai, ( 40 ) ning, ( 30 ) ning, ( 20 ) ning, ( 10 ) ning hpring ai ni hpe gaw shagrau masat laika pa jaw ai lam hpe galaw ai re.
Mungdan ting na rai yang, magam gun ladaw ( 50 ) ning hpring marai ( 4 ), ( 40 ) ning hpring marai ( 48 ), ( 30 ) ning hpring marai ( 128 ), ( 20 ) ning hpring marai ( 219 ), ( 10 ) ning hpring marai ( 588 ) yawng pawng marai ( 987 ) re hpe chye lu ai.
Rawt malan ninghtoi hpawng hta magam dap, makan dap na magam gun ni hte mungchying mungshawa yawng marai ( 1650 ) sa du shanglawm sai rai nga ai.
Zuphpawng ngut ai hpang, hkying 11:00am aten kaw na hkying 1:00pm aten du hkra, Ningbaw Kaba Du Daju Jum Nban La kaw nna, magam dap, makan dap shagu na ramma ni hte mare buga na ramma ni hpe mung, n-gun jaw shatsam mungga shaga ai lam hpe galaw ai.
Ya na zawn rawt malan masat ninghtoi hta Ningbaw Kaba hku nna, ramma ni hpe laksan shatsam mungga shaga ai gaw, shawng ningnan lang rai nga ai.
Ndai rawt malan masat ninghtoi hpawng hpe mungdan kata hte maigan mungdan kaw du nga ai Wunpawng Amyu sha ni mung galaw nga ai lam chye lu ai.
