58 ning hpring ai KIO masat ninghtoi hpawng lamang galaw
58 ning hpring Wunpawng Mungdan Shanglawt Hpung ( KIO ) masat ninhtoi hpawng lamang hpe Ninggawn Daju Pati Komiti ni woi awn nna, October shata 25 ya jahpawt hkying 8:30am aten hta Laiza Muklum Sinpraw Majoi Manau Wang Gawknu kaw galaw ai lam chye lu ai.
Rev. Chyangmaja Tu Shan kaw nna, Amyu sha Shanglawt lam hta woi awn Tingnyang Up galaw lai wa sai Ningbaw Kaba ni a matu, KIO mungmasa lam yan tut nawng ngang grin nga lu na hte Amyu sha ni tut nawng e kam hpa madi shadaw hkan sa nga lu na matu, Wunpawng Amyu sha ni myit hkrum kahkyin gumdin let n-gun lapyin hte Amyu hte Mungdan a lam hta lahkrip ra ra su hprang nga lu na matu hte 2 lang na Wunpawng Amyu sha lam masan bawngban zuphpawng hpe angwi apyaw galaw awng dang la lu na matu Karai Kasang kaw akyu hpyi ya ai.
Ginjaw Komiti Tingnyang Up a KIO masat ninghtoi shatsam mungga hpe Du Up Lama Zau Raw ( Ninggawn Daju Pati Komiti Dinggrin Salang ) hti shalai ya ai.
Salang Kaba Labang Doi Pyi Sa ( Ginjaw Komiti Ningtau Ninggawn Amu Madu ) kaw nna mung, KIO masat ninghtoi hpe n-gun jaw ai shatsam mungga tsun ai hta, Pati Komiti tsang shagu hte Hpung Shang Salang yawng atsam marai ningsam ningja shapraw ai hte Amyu masha shawa, Mungdan masha shawa daw tsa hte woi awn shamu shamawt sa wa ai hpe myit hkrum myit ra, myit su myit rawt hte shakut shaja dating sa wa na matu, n-gun jaw mungga shaga la sai re.
Hpawng hta mungchying mungshawa masha ni, magam dap, makan dap shagu na magam gun masha ni hte KIO hpung shang masha yawng marai 1085 tup sa shang lawm ai. Zuphpawng ngut ai hpang ginsup lamang hpe matut galaw ai. Shana hkying 6:30pm aten kaw nna KIO masat ninghtoi hpe shagrau ai yu ngwi mahkawn hte ka hkrang lamang ni hpe mung, galaw mat wa na re lam chye lu ai.
Wunpawng Mungdan Shanglawt Hpung ( KIO ) hpe lai wa sai 1960 ning October shata 25 ya shani hpaw hpang dat ai mungmasa hpung rai nga ai.
