(59) ning hpring KIO masat ninghtoi Ginjaw Komiti Tingnyang Up a mungga hkamla hpawng galaw

Laiza Muklum Padang Rung Gawknu kaw Ninggawn Daju Party Komiti ni woi awn nhtawm, (59) ning hpring KIO masat ninghtoi Ginjaw Komiti Tingnyang Up a mungga hkamla hpawng hpe October shata 25 ya jahpawt hkying aten hta galaw ai lam chye lu ai.

Sara Kaba Columban Lasang Tu San hpawng ap akyu hpyi ya nhtawm, Rev. Lahpai Shing Rip kaw nna mung Karai Kasang kaw ginlawm akyu hpyi ya ai. Salang Kaba Chyana Zau Awn (Htunghking hte Laili Laika Magam Dap Lithkam, Ninggawn Daju Party Komiti Dinggrin Salang) kaw nna Wunpawng Mungdan Shanglawt Hpung, Ginjaw Komiti Tingnyang Up a (59) ning hpring KIO masat ninghtoi mungga hpe hti shalai ai lam galaw ai.

Hpawng lamang hta Ninggawn Daju Laili Laika hte Shingni Komiti ni woi awn let, October shata 22-23 ya tup, Ninggawn Daju kata na hpaji jawng 5 rai nga ai Laiza lapran tsang jawng, Laiza lahta tsang jawng, Sama Ginwang lahta tsang jawng, IDP lawu tsang jawng hte Munglai Hkyet lawu tsang jawng na jawngma ni hpe Ga shagawp ka shingjawng ai lam, hkrang bung hkrang pan soi shingjawng ai lam hte Shanglawt lu ai hpang na shingran ngu ai hkrang pan soi shingjawng ai hta nambat I.II.III lu ai jawngma ni hpe kumhpa shagrau ai lam galaw ai re.

Sara Kaba Sumlut Gam (Wunpawng Mungdan Shanglawt Hpung, Ginjaw Komiti Tingnyang Up Malai II) kaw nna mung “KIO Ginjaw Komiti kawn woi awn ai hte maren madat mara hkan sa ga, party a lam hka ja ga, party shang ga, party shang masha n law jang Mungdan hpe uphkang na matu nloi ai, ramma ni mung party shang nna hpaji sharin na, hpaji mahkawng na, hpaji law law chye hkra sharin la na, pandung du hkra matut na lit la na gaw ramma ni rai nga ai” nga nna Tingnyang Up a mungga hta la kap nhtawm, ra mara ni hpe n gun jaw shatsam mungga tsun ai.

(59) ning hpring KIO masat ninghtoi hpawng hta sa shang lawm ai Manwin hpyen yen dabang na Sara langai mung, Ningbaw Kaba hte Sara Kaba a mungga hpe na la ai majaw anhte hta n gun kya ai lam ni hpe n gun bai jat la lu ai lam tsun dan ai.

Hpawng hta du sa ai mungchying Kanu Kawa Ramma ni hte Magam Dap, Makan Dap na myit su Du gyi Salang ni yawng marai 1574 tup sa du madat hkamla ai rai nna, Ninggawn Daju kata rai nga ai Laiza, Dai Lawn Rung, Laknak Kaba Dap Ba, Ginjaw Shimlam, Dap Nawng Daju hte Pa Jau Ginjaw Dabang shara hte Dap Ba shagu hkan mung (59) ning hpring KIO masat ninhtoi hpawng lamang galaw ai lam chye lu ai.