60 ning hpring rawt malan masat ninghtoi hpawng lamang galaw
60 ning hpring rawt malan masat ninghtoi hpawng hpe 2021 ning February shata praw 5 ya jahpawt hkying 8:00am aten hta Laiza Muklum Zup Awng Simsa Ginsup Pa hta galaw la lu sai re.
Jahpawt hkying 6:00am aten hta Wunpawng Mungdan Amyu Sha Dawnghkawn sharawt nhtawm, nawku hpung woi sara ni hpawng lamang akyu hpyi ya ai lam galaw ai.
Hpawng hta Wunpawng Mungdan Shanglawt Hpung Ginjaw Komiti Tingnyang Up, Wunpawng Mungdan Shanglawt Kongsi Ningbaw Kaba Du Daju Jum N Ban La kaw nna, mungchying sha ni hpe shana shabra dat ai mungga hta “Shaning 60 ning tup laknak lang rawt malan sa wa ai hta amyu sha kaji kaba, gumgai dingla yawng atsam marai salu salat, asai, du baw asak, Ja gumhpraw sutgan law law arang bang da sai rai nga ai. Sum machyi ai law law nga ai zawn, awng dang ai lam mung tsun nma rai nga ai. Kaji kadun ai kaw na galu kaba ai de, n nga ai kaw na nga wa ai de rawt jat wa saga ai” nga nna tsun ai.
Magam gun ladaw 50, 40, 30, 20, 10 hte magam gun ladaw 5 ning hpring sai amyu shayi ni hpe shagrau sha-a ai lam galaw ai. Dai hpang Myu Sha Gintawng Jinghpaw Wunpawng Karate hpung ni kaw nna, Karate ginsup madun ai lamang hpe mung galaw ai re.
Rawt malan hkrun lam 60 ning laman, Ningbaw Kaba marai 6 woi awn lai wa sai hta 1. GOC Du Daju Lahtaw Zau Seng 2. Salang Kaba Maran Brang Seng 3. Lat Du Daju Jum Malizup Zau Mai 4. Du Daju Jum Lamung Tu Jai 5. Salang Kaba Lanyaw Zawng Hra hte ya ta tut woi awn nga ai Du Daju Jum Nban La ni rai nga ai.
Wunpawng Shanglawt Hpyen Dap hpe 1961 ning February shata 5 ya shani hpaw hpang wa ai rai nna, 2021 ning February shata 5 ya shani gaw 60 ning hpring sai rawt malan masat ninghtoi re hpe chye lu ai.
