(60) ning hpring rawt malan ninghtoi tau ga shagawp shingjawng lamang galaw

Laiza Muklum jawng komiti ni woi awn ai hte Laiza Muklum kata nga ai hpaji jawng shagu na tsang 2 jawngma ni a (60) ning hpring rawt malan ninghtoi tau ga shagawp shingjawng lamang hpe January shata 29 ya jahpawt 9:00am aten hta, Laiza Lahta Tsang Jawng, Rawt Ninghkawng Gawknu kaw galaw la lu sai re.

Shingjawng lamang galaw ai lam gaw, (60) ning hpring rawt malan ninghtoi tau lamang hta, kashu kasha ni yawng lawt lu ai de lahkam sa wa lu na matu, yawng shanglawm gunhpai shakut shaja lu na matu, tinang a amyu, ga, laika, ga shagawp ni hpe manu shadan let tsawra chye ai shayi shadang sha ni tai wa na matu hte jawng kata hta hkum dingnum rawt jat galu kaba wa ai jawngma ni byin tai wa na matu yaw shada ai re lam, Laiza Lahta Tsang Jawng Up Singneng Ja Mai tsun ai.

Ga shagawp shingjawng ai hta, “Rawt Malan Ninghtoi” ngu ai ga baw hte shang lawm shingjawng ai tsang 2 jawngma ni marai (10) kaw na madang shang ai jawngma ni hpe masat masa kumhpa shagrau ai re sha n-ga, Hkrang pan soi, Ga shagawp ka, laika hkachyi ka shingjawng lamang ni hta, madang shang ai jawngma ni hpe mung, daini masat masa kumhpa shagrau ai re.

Shingjawng lamang hta shanglawm ai Laiza Muklum kata na jawng ni gaw, Laiza Lahta Tsang Jawng, Laiza Lapran Tsang Jawng, Sama Ginwang Sasana Lahta Tsang Jawng, Mung Lai Hkyet Lawu Tsang Jawng hte Woi Chyai IDPs Lawu Tsang Jawng, KG pang kaw nna tsang (10) du hkra kaw na jawngma ni shanglawm shingjawng ai lam chye lu ai.