(61) ning hpring KIO masat ninghtoi mungga madat hkamla lamang galaw
Laiza, Alen Bum IDP hpaji jawng, boarder nga jawngma ni hpe October shata (25) ya jahpawt hkying 9:00am aten hta, Wunpawng Mungdan Shanglawt Hpung, Ginjaw Komiti Tingnyang Up, Du Daju Jum Nban La a (61) ning hpring KIO masat ninghtoi shatsam mungga madat hkamla hpawng hte KIO masat ninghtoi shagrau ginsup lamang woi galaw ai lam chye lu ai.
Lamang hta, Alen Bum IDP hpaji jawng up, sara kaba Maru Hkawng Lum kaw nna (61) ning hpring KIO masat ninghtoi shatsam mungga hpe hti ginlen ya ai lam galaw ai rai nna, sharin sara, saranum ni kaw nna mahkawn woi hkawn ai lam, KIO masat ninghtoi hpe hkap tau shagrau ai ginsup lamang ni woi galaw ai lam, Alen Bum IDP hpaji jawng, ningtau jawng up saranum kaba Hkangda Ja San Li tsun ai.
Alen Bum IDP hpaji jawng hta, ya aten boarder nga jawngma marai 1300 jan nga ai rai nna, sharin saranum ni yawng marai 100 jan nga ai lam chye lu ai.
KIO masat ninghtoi lamang hpe lai wa sai shaning ni hta gaw, KIO uphkang ginra ni hta, mungshawa, dap shawa yawng shang lawm ai hte wu wu di di galaw ai raitim, 2021 ning hta gaw, COVID-19 ana zinli a majaw, KIO masat ninghtoi mungga hpe online hku nna ndau shabra ai lam, mai byin ai Magam Dap ni hkan sha hpawng lamang hpe COVID-19 ana zinli makawp ninghkap tara hte maren galaw ai lam chye lu ai.
Wunpawng Mungdan Shanglawt Hpung (KIO) hpe lai wa sai 1961 ning, October shata (25) ya shani hpaw ninghtan wa ai rai nna, dai ning gaw (61) ning ladu hkrum sai re.
