(64) ning hpring rawt malan masat ninghtoi hpawng galaw
KIO a (64) ning hpring rawt malan masat ninghtoi hpawng lamang hpe February shata praw 5 ya jahpawt Laiza kaw galaw la lu sai re.
Hpawng hta Wunpawng Mungdan Shanglawt Hpung, Ginjaw Komiti Tingnyang Up, Wunpawng Mungdan Shanglawt Kongsi Ningbaw, Wunpawng Mungdan Shanglawt Hpyen Dap, Dap Up Daju Du Daju Jum Nban La a (64) ning hpring rawt malan masat ninghtoi shatsam mungga hpe Du Up Jum Wawhkyung Sin Wa kaw nna, hti shalai ya ai lam galaw ai.
Matut nna mungga hti shalai ngut ai hpang, magam gun ladaw (50) ning hpring sai magam gun marai (4) hpe Ginjaw Komiti Tingnyang Up Malai-1 kaw nna, Ja Dakhkama hte masat masa lekmat hpe shagrau sha-a ai lam galaw ai re.
(64) ning hpring rawt malan masat ninghtoi hta Wunpawng Mungdan ting na magam gun ladaw (5) ning hpring sai magam gun marai (65), (10) ning hpring sai magam gun marai (917), (20) ning hpring sai magam gun marai (250), (30) ning hpring sai magam gun marai (76), (40) ning hpring sai magam gun marai (21) hte (50) ning hpring sai magam gun marai (6) yawng marai (1335) hpe shagrau sha-a ai lam ni galaw ai hpe chye lu ai.
Laiwa sai ten ni hta rawt malan masat ninghtoi hpawng lamang hpe mungshawa, dap shawa law law hte galaw ai lam nga ai raitim, ya aten na mungmasa hpyen masa a majaw, kadai mung kade a Magam Dap, Makan Dap, Dap Ba, Dap Dung hte hpyen yen dabang ni hta galaw ai lam chye lu ai.
