(64) ning hpring Wunpawng Mungdan Shanglawt Hpung masat ninghtoi hte magam gun ladaw (60) ning hpring shagrau sha-a hpawng galaw
(64) ning hpring Wunpawng Mungdan shanglawt hpung masat ninghtoi hte magam gun ladaw (60) ning hpring shagrau sha-a hpawng lamang hpe October shata 25 ya jahpawt hkying 8:00am aten, Mung Seng Yang Golf pa kaw galaw la lu sai re.
Hpawng hta Wunpawng Mungdan Shanglawt Hpung Ginjaw Komiti Tingnyang Up, Du Daju Jum Nban La a (64) ning hpring Wunpawng mungdan shanglawt hpung masat ninghtoi mungga hpe Ginjaw Komiti Ninggawn Amu Madu, Sara Kaba Kumhtat Hting Nan kaw nna hti shalai ya ngut ai hpang, magam gun ladaw (60) ning hpring sai magam gun ni hpe shagrau sha-a ai lam galaw ai re.
Shagrau sha-a ai lam hta magam gun ladaw (60) ning hpring sai magam gun marai (2) hpe Ja dakkama, masat masa shagrau lekmat pa hte gumhpraw ni hpe Ginjaw Komiti Tingnyang Up Malai, Du Daju Jum Gunhtang Gam Shawng kaw nna, shagrau sha-a ya ai lam galaw ai.
Ndai zawn shagrau ai lam hta shagrau hkamla sai, Du Daju Jum Nban La kaw nna, shi hkrum wa ai mahkrum madup hpe ya na zawn tsun ai hta
“Ndai 60 ning sharau dazik hpe loi loi hte lu ai gaw nre, manu mana hkrit tsang ra ai, manu mana jamjau ai, hpyen a kata de shang mat wa ai na hkrit tsang ra ai lam amyu myu katut laiwa ai raitim mung, karai kasang gaw ning re lam ni hta tawt lai lu nna ya na zawn 60 ning shagrau sha-a dazik, nye matu gaw mana maka reng ai hku na re, manu daw dan nlu ai ja dazik rai nga mali ai, dai majaw Wunpawng mungdan shanglawt hpung ginjaw komiti hpe mung chyeju dum ai, Wunpawng mungdan magam gun manaw manang ni yawng hpe ma chyeju dum ai, yawng e makawp maga ai majaw ndai 60 ning ja dazik hkamla lu hkra re gaw yawng e makawp maga ai chyeju a majaw lu la ai lam rai nga ai,
Mungshawa hpe mung chyeju dum ai mungshawa ni makawp maga ai, jaw lu jaw sha ai 60 ning magam gun hkra asak hkrung lu ai ngu ai gaw ngai langai mi atsam sha nre, mungshawa dap shawa yawng a atsam dai kaw karai kasang makawp maga ai majaw, ndan re ja dazik dai ni hkamla lu ai majaw garai kabu ai re” nga nna tsun ai.
Dai ni na hpawng lamang hta Ginjaw Komiti salang ni, Magam dap, Makan dap hkan na magam gun ni hte mungshawa ni sa du shang lawm ai hte galaw la lu sai re.
Laiwa sai ten ni hta KIO masat ninghtoi hpawng lamang hpe mungshawa, dap shawa law law hte galaw ai lam nga ai raitim, ya aten hta mungmasa hpyen masa lam amyu myu a majaw, gadai mung gade a Magam Dap, Makan Dap, Dap Ba, Dap Dung, hpyen yen dabang ni hta galaw ai lam nga ai hpe chye lu ai.
