67 lang na KTCS Chyum Dakkasu jawng yu hpawng hte magam gun 25 ning hpring, 50 ning hpring, ni hpe shagrau shaa hpawng galaw
67 lang na KTCS Jinghpaw Wunpawng Chyum Dakkasu jawng yu shagrau shaa jawng yu hpawng hpe Myitkyina Muklum, Nawngnang AD 2,000 Masat Htingnu hta March 11 ya
shani hkying 11:00am aten hta galaw la lu sai lam na chye lu ai.
Jawng yu shagrau shaa lakmat hkamla ai jawngma ni hta, Licentiate Theology ( L.Th, Kachin, English ) na marai 29, Bachelor of Theology ( B.Th ) na marai 48, Master of Divinity ( M.Div ) na marai 95, Master of Ministry ( M.Min ) na marai 7, Master of Arts in Christian Studies ( MACS ) na marai 6, Bachelor of Arts in Theological Studies ( BATS ) English na marai 8, Music na marai 9, yawng marai 225 tup re lam, jawng yu mungga hpe KBC ningbaw Rev. Lalawk Gyung Hkawng kaw nna tsun shaga ai lam buga masha ni kawn chye lu ai.
Jawng yu hpawng hte kapawn nhtawm, KTCS Nawngnang Chyum Jawng kaw nna, mare buga de magam wa gun ai 25 ning hpring, 50 ning hpring ni hte magam gun usa ni hpe chyeju dum kumhpa shagrau ai lam, bai nna, laiwa sai shaning hta Myen mung Dakkasu san poi hta chyalai ningtawn madang ( All Distinction ) hte awng pru ai jawngma ni a buga Gies mare hpung hpe mung shagrau shaa masat masa galaw ai lam na chye lu ai.
Ya jawng yu ai jawngma ni hku nna, du wa na April shata hta magam shachyen wunkat hpe matut lung la nhtawm, mare buga de Karai Kasa a sasana magam bungli ni hpe gun hpai sa wa sana re lam mung chye lu ai.
