(71) lang ngu na Jinghpaw Wunpawng Chyum Dakkasu awng lakmat shagrau sha-a hpawng galaw la lu
Jinghpaw Wunpawng Chyum Dakkasu (KTCS), Nawng Nang Myitkyina a (71) lang ngu na jawng awng lakmat shagrau sha-a nawku hpawng kaba hpe April shata praw 8 ya jahpawt hkying 9:00am aten kaw nna hkying 1:30pm aten laman, KTCS jawng wang AD 2000 Gawknu kaw galaw la lu sai lam chye lu ai.
KTCS a 2020-2021 ning jawng lung shaning hta awng pru ai jawngma ni gaw, Diploma in Computer Application (DCA) marai (27), Diploma in Early Childhood Care & Development (Dip ECCD) marai (30), Licentiate Theology (L.Th) marai (20), Bachelor of Ministry (B.Min) marai (13), Bachelor of Arts in Theological Studies (BATS English) marai (17), BAST Music marai (9), BAST Community Development marai (4), Bachelor of Theology (B.Th) marai (121), Master of Ministry (M.Min) marai (13), Master of Arts in Christain Studies (MACS) marai (3), Master of Divinity (M.Div) marai (58) hte Master of Theology (M.Th) marai (1), yawng marai 316 tup re lam chye lu ai.
Jawng awng lakmat shagrau hpawng hta, jawng gawk kata ningtawn ai jawngma ni hpe Academic Award, Judson Educational Award (MBC), Rev.Lahpai Zau Tu Award, Rev. Lahtaw Gum Se Award, Rev. Dr. Saga Hkyen Naw Award hte Rev. Dr. Ola Hanson Award (KBC) ni jaw shagrau ai.
Jawng awng pru nna (25) ning, (50) ning magam gun sai sara/num ni hte 2019-2020 ning jawng lung shaning hta tsang (10) hpe ningtawn ai hku (all distinctions) hte awng dang la lu sai jawngma ni hpe mung shagrau sha-a ai lam galaw ai re hpe chye lu ai.
