72 lang na Jinghpaw Mungdaw Masat Nhtoi galaw na
Amyusha Zinlum Hpung kaw nna woi awn nhtawm, 72 lang na Jinghpaw Mungdaw Masat Nhtoi hpe January shata 10 ya shani Hpakant hte Potao kaw, wu wu di di galaw sa wa na re lam chye lu ai.
“Jinghpaw Mungdaw Masat Nhtoi hta Wunpawng Amyusha Dawnghkawn hpe sharawt shagrau ai lam galaw na rai nna, mungshawa ni mung tinang a dum nta kaw jahpawt hkying 6:15am kaw nna shana de hkying 6:15pm aten du hkra, amyusha dawnghkawn sharawt da na re. Hpakant Maw Wan nlung shadaw masat kaw jahpawt hkying 10:00am aten hta yawng hkrum zup ai hte Jinghpaw mungdaw shangai nhtoi lamang hpe wu wu di di rai, hpawng de nawku daw jau ai lam galaw na re nga nna” Myusha Zinlum Hpung na Sara Dashi Naw Lawn tsun ai.
Dai hpawng lamang hta KBC ningbaw Rev. Dr. Hkalam Samson hte Sara Kaba Lanan Bawk hpe mung saw shaga da ai rai nna, shana na aten hta Jinghpaw Wunpawng yu ngwi ninghkring kaba ni sa du shangwi shapyaw na hte, Jinghpaw amyu bawsang shagu na Htunghking ka hkrang lamang ni mung lawm na re lam chye lu ai.
72 lang na Jinghpaw Mungdaw Masat Nhtoi chyeju shakawn akyu hpyi hpawng lamang hpe Namti, Kamaing, Manmaw mare kaba ni hta mung galaw sa wa na re lam chye lu ai.
Photo; Fb, Latawng Uma
