72 lang na Jinghpaw Mungdaw Masat Nhtoi Manau poi hpe angwi apyaw galaw la lu
Manmaw Muklum deng 2 Awng Ta Htunghking Manau wang kaw 72 lang na Jinghpaw Mungdaw Masat Nhtoi manau poi lamang hpe January shata 10 ya shani hta angwi apyaw galaw la lu sai lam chye lu ai.
Manmaw Wunpawng Shingni Hpung kaw nna woi awn ai hte January praw 9 ya shana de manau nauhpaw lamang galaw nhtawm, January praw 10 ya shana daw hta manau nau gup lamang hpe galaw la lu sai rai nna, yu ngwi pinra lamang, Fashion show lamang hte ginsup lamang ni hpe mung galaw ai re.
Matut nna Hpakant Maw Wan nlung shadaw pa kaw mung, Amyusha Zinlum Hpung ni woi awn nhtawm, 72 lang na Jinghpaw Mungdaw Nhtoi akyu hpyi hpawng hpe galaw ai rai nna, bawsang shagu na Htunghking ka hkrang lamang ni ka manawt ai lam galaw ai sha n-ga Wunpawng Amyusha ni a dum nta shagu hta mung Amyusha Dawnghkawn hpe sharawt da ai lam chye lu ai.
Jinghpaw Mungdaw Masat Nhtoi lamang hpe Myitkyina, Namti Lambraw Yang, Ka Mai mare, Putao, Sagaing hte kaga shara law law hta mung galaw ai lam chye lu ai.
