(74) ning hpring Kachin state day lamang galaw
(74) ning hpring Kachin state day masat ninghtoi chyeju shakawn akyu hpyi lamang hpe Wunpawng Amyu Sha Mungbawng Rapdaw (WMR) Rung kaw January shata (10) ya jahpawt hkying 9:00am aten hta galaw ai lam chye lu ai.
Akyu hpyi hpawng hta, WMR Rung magam gun ni, E.C Ninghpum salang ni, Myitkyina ginra, Waimaw ginra dat kasa ni, amyu shayi ni shang lawm ai hte galaw la lu sai lam chye lu ai.
(74) ning hpring Kachin state day lamang hpe myit dum shagrau ai masat masa hku nna, Amyu sha hte Mungdan ahkaw ahkang ni hpring tsup wa na matu madung akyu hpyi ai lamang re lam, WMR tsun ahkang lu, Sara Nhkum Tang Gun tsun ai.
(74) ning hpring Kachin state day masat ninghtoi akyu hpyi hpawng hpe nawku hpung, wuhpung wuhpawng ni tinang htap htuk manu ai ladat hte galaw sa wa na matu mung, (74) ning hpring Kachin state day shabyin shatai komiti Myitkyina ni kaw nna ndau shana ai lam mung nga ai.
Masat ninghtoi hta, Wunpawng amyu sha dum nta shagu jahpawt hkying 6:00am aten kaw nna shana hkying 6:00pm aten du hkra Amyusha Dawng Hkawn hpe sharawt ai lam, amyu sha hte Mungdan a matu ja ja akyu hpyi myit dum nga na lam hpe ndau da ai re hpe chye lu ai.
