Gumshem Myen hpyen dap ni asak (14) ning re ai mung mare masha Ma langai hpe rim woi mat
KIA Masat (2) Dap Ba, Masat (14) Dap Dung ginra, Nawngmi mare hte Nawngmi mare dingsa lapran kaw hpyen shamu shamawt hkawm nga ai Gumshem Myen hpyen hpung ni hpe October praw 8 ya jahpawt hkying 7:15am aten hta, KIA Dap Dung (20) hpyen hpung ni bawm hte hkap gap gasat ai lam chye lu ai.
Gasat gala byin ai hpang, jahpawt hkying 8:10am aten hta gaw, Nawngmi mare dingsa kaw na Gumshem Myen hpyen la ni, asak (14) ning re ai Ma langai hpe rim woi mat ai rai nna, mare Salang ni hte Kanu Kawa ni hkan tsun ai raitim, ndat ya shi ai re lam, ginra masha ni tsun shana wa ai.
Rim woi hkrum ai shadang sha gaw, Nawngmi mare lawk (3) na Salang Zinhtung Gam Yaw a kasha Shadang Zinhtung Nawng Lat asak (14) ning rai nna, Dumsu shat dan sa ai kaw Gumshem Myen hpyen la ni rim woi la hkrum ai re lam, matut chye lu ai.
Ya aten KIA Masat (2) Dap Ba ginra, Danai Lido lam mayan de Gumshem Myen hpyen dap ni kawn hpyen shamu shamawt ai lam nhkring nsa galaw nga ai majaw, KIA hpyen hpung ni hte gasat gala majan matut manoi byin nga ai re.
